Egizderin óltirgen erli-zaıyptynyń úlken ulyn atasy alyp ketýge nıet bildirgen
ALMATY. QazAqparat - Almatyda egiz uldaryn óltirip, tońazytqyshqa tyǵyp ketken erli-zaıyptynyń tuńǵysh ulyn atasy Ózbekstanǵa alyp ketpek, dep habarlaıdy QazAqparat tilshisi.
Búgin atalǵan is boıynsha aldyn-ala sot tyńdaýy ótti. Іs boıynsha jábirlenýshi retinde 2 jastaǵy Ravıl Volchenkonyń ókili retinde Medeý aýdandyq bilim bóliminiń qyzmetkeri keldi.
Medeý aýdandyq bilim bóliminiń bas mamany Aıtkúl Kemebaeva balanyń taǵdyry qalaı bolatynyn aıtyp berdi.
Onyń sózinshe, qazir 2 jastan asqan Ravıl Volchenko №2 balalar úıinde.
«Balanyń densaýlyǵy jaqsy, onymen kúnde psıhologtar jumys jasap jatyr. Bala №2 aýrýhanada ońaltý sharalarynan ótti. Sol ýaqyt aralyǵynda qujattar rásimdelip, Balalar úıine aýystyryldy», - dedi Aıtkúl Kemebaeva.
2 aıdan beri balalar úıinde jatqan Ravıldi izdep 3 apta buryn Ózbekstannan atasy kelip ketken. Sol ketkennen ázirge atasynan habar joq.
Al erli-zaıyptylar áli de Ravıldiń ata-anasy sanalady.
«Sot protsesi aıaqtalǵansha bala balalar úıinde turady. Úkim shyqqan soń ǵana balaǵa ata-anasynyń qamqorlyǵynsyz qaldy degen mártebe beriledi. Áke sheshesi ata-analyq quqyǵynan aırylady», - dedi Aıtkúl Kemebaeva.
Gılmýtdınovtyń qorǵaýshysy mundaı qylmys alkogoldik ishimdikke mas bop turǵan kezde jasalǵanyn aıtty.
Basty sot otyrysy 24 qarasha kúni tańerteńgi saǵat 10-ǵa belgilendi.
Sýdıa Volchenko men Gılmýtdınovtyń jýrnalısterdi qatystyrmaý týraly ótinishin ishinara qanaǵattandyrdy.
Eske sala ketsek, jantúrshigerlik oqıǵa osydan eki aı buryn Túriksib aýdanynda bolǵan. Kóppáterli úılerdiń birinde tońazytqyshtyń ishinen óli sábıler tabyldy. Eki ul balanyń ólimi mehanıkalyq asfıksııadan bolǵany anyqtaldy.
Keıin olardy týǵan ákesi Emıl býyndyryp óltirgeni belgili boldy. Sosyn múrdelerdi tońazytqyshqa salyp ketken. Er adam sotta istegenin moıyndap, balalardyń jylap uıqy bermegenin aıtqan. Bul iske erli-zaıypty ózara kelisimmen barǵan.
Keıin balalardyń anasy Alla Volchenko men kúıeýi úlken uldary Ravıldi Samal shaǵyn aýdanyndaǵy aýlalardyń birinde qańǵyrtyp tastap ketken. Bala aýlada 3 kún júrgen kórinedi. 2-3 jastaǵy Ravıldi Samal shaǵyn aýdanyndaǵy aýlalardyń birinde turǵyndar taýyp alyp polıtsııa shaqyrǵan. Keıinirek polıtsııa balanyń ata-anasyn mas kúıinde taýyp alǵan.
