Egiz balalardy óltirgen áke polıtsııaǵa óz aıaǵymen barýǵa kóngen
ALMATY. QazAqparat - Egiz balalardyń ólimine qatysty kúdikti Alla Volchenko sotta azamattyq nekedegi kúıeýin polıtsııaǵa baryp, kinásin moıyndaýǵa qalaı kóndirgenin aıtty, dep habarlaıdy QazAqparat tilshisi sot zalynan.
Egiz balanyń anasy Alla Volchenko sotta balalardyń ólgeni týraly habardy qalaı estigenin, kúıeýin qalaı polıtsııa barýǵa kóndirgenin aıtty.
«Ol basynda maǵan balalardyń qaıda ekenin aıtpady. Balalar úıine aparyp tastaǵanyn aıtyp, maǵan araq ishkizdi. Men ashýlandym. Ol ýaqyt sozyp, sosyn aıtamyn dedi. Men balalar úshin qorqyp kettim. Sol kezdegi kúıimdi qazir jetkize almaımyn. Ol maǵan balalardy tunshyqtyryp óltirgenin aıtty. Sosyn, eger bireýge aıtsam, úlken ulymdy da egizderdiń sońynan «attandyratynyn» aıtty. Men úlken ulymnyń ómiri úshin qatty alańdadym», -dedi Volchenko.
Volchenko azamattyq nekedegi kúıeýi Emıl Gılmýdtınovti polıtsııaǵa baryp, barlyǵyn moıyndaýǵa kóndirgenin aıtty. Gılmýtdınov buǵan mastyqtan esin jıǵannan keıin, erteńinde 12 qyrkúıek kúni kelisimin bergen.
Volchenko Gılmýdtınovtiń araqty jıi ishetinin, mas kúıinde ne istep, ne qoıǵanyn bilmeıtinin aıtty.
Eske sala ketsek, 11 qyrkúıek kúni jantúrshigerlik oqıǵa Túrkisib aýdanynda bolǵan. Kóppáterli úılerdiń birinde tońazytqyshtyń ishinen sábılerdiń múrdesi tabylǵan. Sol kúni Medeý aýdanynda adasyp júrgen eki jastaǵy er bala polıtsııaǵa jetkizildi. Bala ólgen egizderdiń aǵasy ekeni anyqtaldy. Egizderdiń ólimine kúdikti retinde olardyń ata-anasy ustaldy. Qazirgi ýaqytta sot aldynda Qazaqstan azamatshasy Alla Volchenkomen onyń azamattyq nekedegi Ózbekstan azamaty Emıl Gılmýtdınov jaýap berýde. Olarǵa qatysty QR QK 99-babynyń 2-bólimi, 1,3,7 (kisi óltirý) tarmaqtary jáne 119-baptyń 1 bólimi (qaraýsyz qaldyrý) boıynsha is qozǵalǵan.
