Egis jumystaryn qarjylandyrý kólemi qandaı
«Agrarlyq nesıe korporatsııasy» aktsıonerlik qoǵamyna agroónerkásiptik keshen sýbektilerin qoldaý jónindegi is-sharalardy júrgizý úshin respýblıkalyq bıýdjetten 70 mlrd teńge bıýdjettik kredıt bólindi. Qarajat respýblıkanyń 2,4 myń aýyl sharýashylyǵy óndirýshisine berilip, kóktemgi dala jumystaryn júrgizýge baǵyttaldy. Sondaı-aq, Memleket basshysynyń tapsyrmasy boıynsha Qarapaıym zattar ekonomıkasy baǵdarlamasy aıasynda kóktemgi egis jumystaryn júrgizýge 100 mlrd teńge bólindi. 26 mamyrdaǵy jaǵdaı boıynsha 19,1 mlrd teńgege 331 ótinim qabyldandy», - dedi S. Omarov.
Onyń sózine qaraǵanda, Memleket basshysynyń tapsyrmasyn oryndaý maqsatynda aýyl sharýashylyǵy ónimderin forvardtyq satyp alýdy júzege asyrý jumystary bastaldy. 24,5 mlrd teńge kóleminde qarajat bólindi, oǵan bıdaı, arpa, maıly daqyldar jáne qaraqumyq sııaqty daqyldar satyp alynatyn bolady. Qazirgi ýaqytta 21,5 mlrd teńgege ótinim qabyldandy.
«Qamtamasyz etý retinde ekinshi deńgeıdegi bankterdiń de, áleýmettik-kásipkerlik korporatsııalardyń da kepildikteri qabyldanady. Bul fermerlerdiń ótimdi kepilderiniń jetispeýshiligi máselesin sheshýge múmkindik beredi. Kóktemgi dala jumystaryn ýaqtyly jáne sapaly júrgizý úshin qolda bar barlyq resýrstar men quraldar paıdalanylýda, bul kózdelgen jumystardy ońtaıly agrarlyq merzimderde aıaqtaýǵa alǵysharttar týǵyzady», - dedi Saparhan Omarov.
Budan buryn habarlanǵandaı, 2020 jyly aýyl sharýashylyǵy daqyldaryn 22,5 mln gektar alańǵa egý josparlanýda, bul 2019 jylǵy deńgeıden 238 myń gektarǵa kóp. Dándi daqyldar alańy 14,9 mln gektardy quraıdy, bul ótken jylmen salystyrǵanda 191,6 myń gektarǵa kem.