Egıpettegi temirjol apaty: eki poıyz soqtyǵysty
ASTANA. 11 qarasha. QazAqparat - Egıpette temirjol apaty boldy. Eki poıyzdyń soqtyǵysýy saldarynan keminde 5 adam qazaǵa ushyrap, 30-y jaralandy, dep habarlady RBK.
Oqıǵa Feıým provıntsııasynda Kaırden ońtústik-batysqa qaraı 100 shaqyrym jerde boldy. Aldyn ala málimetterge qaraǵanda apat jol strelkasyn aýystyrýshynyń qateliginen boldy.
Jergilikti BAQ-tyń habarlaýynsha, 12 adam aýrýhanaǵa jetkizildi, 18 adam qaralǵannan keıin bosatyldy.
Egıpette temirjol oqıǵasy jıi bolyp turady. Shildeniń ortasynda Kaır mańynda jolaýshylar poıyzy relsten shyǵyp ketip, órtendi. Sonda apat saldarynan 4 adam kóz jumyp, 70-ke tarta jolaýshy zardap shekti.
Egıpettiń temirjoldaryndaǵy eń úlken apat 2002 jyly boldy. Ol kezde poıyzda shyqqan órt saldarynan 363 adam qazaǵa ushyraǵan bolatyn.
