Egıpettegi kóshe qaqtyǵystary: 11 adam qaza boldy
ASTANA. 4 qańtar. QazAqparat - Keshe Egıpette polıtsııa men taqtan taıdyrylǵan prezıdent Mohammed Mýrsıdiń jaqtastary bolyp tabylatyn ıslamıstermen qaqtyǵysta 11 adam qaza boldy, dep habarlady Associated Press egıpettik Densaýlyq saqtaý mınıstrliginie silteme jasap.
Resmı málimetter boıynsha, 50-den astam adam jaraqattanǵan. «Musylman baýyrlar» bul derekter azaıtyp kórsetilgen dep sanaıdy. Olardyń aıtýynsha, qaza bolǵandardyń ózi 19 adam bolyp otyr, dep habarlady RBK.
Basty qaqtyǵystar Kaırdiń, Gızanyń, Ismaılııanyń jáne Faıýmnyń halyq tyǵyz qonystanǵan jerlerinde ótken. ІІM málimetteri boıynsha, aktsııa barysynda «Musylman baýyrlar» qozǵalysynyń 122 múshesi tutqyndalǵan.
Eske sala keteıik, 2013 jylǵy jeltoqsanda Egıpette qozǵalystyń birqatar belsendileri tutqyndaldy, al «Musylman baýyrlar» uıymynyń ózi lańkestik dep jarııalanǵan. Budan bylaı, qarsylyq aktsııasyna qatysqan «Musylman baýyrlar» uıymyna qatysy bar adamdar 5 jylǵa deıin tutqyndalýy múmkin.
Referendým qarsańynda qarsylasýshylar sý shashyp, kózden jas aǵyzatyn gazben atqylaǵan polıtsııalarǵa tas laqtyrýmen qatar otty qarýdy da qoldanýda. Sherýshiler polıtseı beketterine janǵysh zat qospasymen bótelkeler laqtyryp, birneshe polıtseı mashınalaryn órtep jiberdi, negizgi joldardy japty, shınalardy órtedi.
Egıpettiń ýaqytsha prezıdenti Adlı Mansur 2013 jylǵy shildede ótpeli kezeńdegi josparyn usyndy. Oǵan sáıkes aldymen Konstıtýtsııaǵa túzetý engizýdi kózdeıtin referendým, odan keıin parlamenttik saılaý jáne sodan keıin ǵana eki aıdan soń el prezıdenti saılaýyn ótkizý qajet. Konstıtýtsııalyq referendým 2014 jylǵy 14-15 qańtar kúnderi ótedi. Qazirgi úkimettiń jaqtaýshylary parlament saılanǵanǵa deıin prezıdent saılaýyn ótkizý máselesin birneshe ret kóterdi.
