Egıpette sporttyq baǵdarlamalaýdan álem chempıonatynda qazaqstandyq stýdent altyn jeńip aldy
ASTANA. KAZINFORM – Egıpette sporttyq baǵdarlamalaýdan 2022 jáne 2023 jylǵy álem chempıonatynyń fınaldyq kezeńderi aıaqtaldy. 2023 jylǵy fınalda Harbor Space University komandasynyń (Barselona, Ispanııa) quramynda qatysqan qazaqstandyq Batyr Sardarbekov altyn medal jeńip aldy.
«Batyrdyń komandasy týrnır boıy kósh bastap, jeńimpazdar qatarynda márege jetti. Qazaqstandyq sporttyq baǵdarlamashylar ICPC jarystaryna 20 jyl boıy qatysyp. Osy joly qazaqstandyq komanda alǵash ret altyn medalǵa qol jetkizdi. Batyr Sardarbekovtyń jeńisi Qazaqstanda osy zııatkerlik sport túrin damytýǵa úlken serpin beredi», - delingen habarlamada.
Ótken jylǵy fınalda bizdiń elden 4 komanda baq synady: Astana IT University (Astana q.), Qazaqstan-Brıtan tehnıkalyq ýnıversıteti (Almaty q.), Nazarbaev Ýnıversıtet (Astana q.), Halyqaralyq aqparattyq tehnologııalar ýnıversıteti (Almaty q.). Tartysty saıysta olar Sıngapýr Ulttyq ýnıversıtetimen jáne Melbýrn Ýnıversıtetimen birge 54 komandadan oq boıy ozyq bolǵan edi.
Aımaqtyq irikteýden, kvalıfıkatsııa kezeńderinen ótip, eń bedeldi ICPC World Finals baǵdarlamalaýdan komandalyq olımpıadanyń fınalısteri qataryna ený — qazaqstandyq komandalardyń tamasha jetistigi, básekelestik joǵary bolǵany sonsha, fınalǵa shyǵý úlken jetistik bolyp sanalady. Komanda quramyna planetanyń eń úzdik stýdent-baǵdarlamashylary, jahandyq IT-salanyń bolashaq juldyzdary ǵana kire alady.
Jyl saıyn Qazaqstan atynan qatysýshylar sany artyp keledi, bul joly olardyń sany rekord jasap, basqa elderdiń kórsetkishterinen asyp tústi. Sporttyq baǵdarlamalaýdy damytý — Qazaqstannyń jańa, bilikti jáne suranysqa ıe IT mamandaryn ósirip-jetildirý baǵytynda jasaǵan qadamy.
ICPC World Finals 2024 sporttyq baǵdarlamalaýdan álem chempıonatyn ótkizetin kelesi el Qazaqstan bolady. Chempıonattyń fınaly qyrkúıek aıynda Astanada ótedi.
