Egıpette parlament saılaýy kúni belgilendi
ASTANA. 19 qyrkúıek. QazAqparat - Egıpette prezıdent taǵynan taıdyrylǵannan beri alǵashqy ret 2011 jylǵy 21 qarashada saılaý ótkizilmek, dep habarlady Reuters agenttigi arabtyń «Ál-Arabııa» spýtnıktik telearnasyna silteme jasap.
Telearnanyń málimeti boıynsha, 21 qarashada mysyrlyqtar parlamenttiń tómengi palatasyna, al eki aıdan keıin - 2012 jylǵy 22 qańtarda joǵarǵy palataǵa úmitkerlerdi saılaıdy. «Ál-Arabııa» bul aqparatty Mysyrdyń Ortalyq saılaý komıssııasy tóraǵasyna silteme jasap jarııalap otyr.
Reuters saılaý kúni týraly resmı túsindirmeni ázirge almaǵanyn atap kórsetti.
Esterińizge sala keteıik, 2011 jylǵy qańtardaǵy jappaı buqaralyq tolqýdan keıin Mysyr prezıdenti Hosnı Múbarak qyzmetinen ketken bolatyn. Ol el bıligi taǵynda 30 jylǵa tarta ýaqyt otyrdy. Onyń otstavkasynan keıin Egıpettiń bıleýshi Ulttyq-demokratııalyq partııasy taratyldy, al onyń qyzmetine sot sheshimimen tyıym salyndy.
