Egıpette ótken jarysta parajúzýden qazaqstandyqtar alty medal aldy

ASTANA. KAZINFORM – Egıpet astanasy Kaır qalasynda ótken World Series of Paraswimming álemdik jarysynda Qazaqstan namysyn qorǵaý úshin Astana qalasynan attanǵan eki sportshy jeńis tuǵyrynan kórindi.

Astana qalasy ákimdiginiń málimetine súıensek, jarystyń alǵashqy kúnderi elordalyq parasportshylar úshin asa sátti boldy. Jastar arasynda 50 metrlik erkin stılde Ersultan Námetýllaev (S9) pen 100 metrlik brass boıynsha Álı Turǵanbekov (SB4) qola medal jeńip aldy.

Ulttyq quramanyń bas jattyqtyrýshysy Aıdar Qartpaev jarys nátıjelerine joǵary baǵa berdi.

— Bul jarysta elimizdiń sportshylary jalpy 2 altyn, 2 kúmis jáne 2 qola medal enshiledi. Olardyń ishinde Astana qalasynyń qos sportshysy erekshe nátıje kórsetti. Ersultan Námetýllaev 50 metrlik erkin stılde 30,00 sekýnd kórsetip, Qazaqstannyń jańa rekordyn ornatty. Bul onyń jeke jetistigi ǵana emes, el úshin úlken maqtanysh. Sonymen qatar, Álı Turǵanbekov 100 metrlik brass jarysynda óz nátıjesin jaqsartyp, Qazaqstannyń taǵy bir rekordyn jańartty. Ol jastar arasyndaǵy álem chempıonatyna qatysý normatıvin de oryndady. Osyndaı jarystar sportshylarymyzǵa úlken tájirıbe beredi. Bul — bıylǵy jyldyń sońǵy dodasy, endi 2025 jyly Sıngapýrda ótetin álem chempıonatyna daıyndyqty bastaımyz, — dedi ol.

Aıta ketsek, jarysqa álemniń 18 elinen 90-ǵa jýyq parasportshy qatysty. Astanalyq sportshylardyń bul jetistigi — Qazaqstannyń parasport salasyndaǵy jańa belesi.

Eske sala keteıik, buǵan deıin Astanada parasportshylardyń qurmetine kórme ashylǵanyn jazǵan bolatynbyz.