Egıpette fýtbol matchyndaǵy búlikke qatysqan 75 adamǵa aıyp taǵyldy
ASTANA. 17 naýryz. QazAqparat - Egıpettiń bas prokýratýrasy Port-Saıd qalasynda aqpanda ótken fýtbol matchyndaǵy búlikke qatysqan 75 adamǵa aıyp taǵyp otyr.
Lenta-rý agenttiginiń habarlaýynsha, olarǵa kisi óltirdi nemese nemquraıdylyqqa boı aldyrdy degen aıyp taǵylǵan.
Kiná taǵylǵandardyń 9-y polıtsııa qyzmetkerleri, olardyń arasynda Port-Saıd qalasy qaýipsizdiginiń burynǵy basshysy da bar. Sondaı-aq jergilikti «Ál-Masrı» fýtbol klýbynyń 3 oıynshysy men 2 kámeletke tolmaǵan jasóspirim bar.
Olardyń tutqynǵa alynǵany nemese alynbaǵandyǵy ázirshe belgisiz. Degenmen buǵan deıin de oryn alǵan oqıǵaǵa baılanysty 47 adamnyń tutqyndalǵandyǵy habarlanǵan bolatyn. Al olardyń kiná taǵylǵandar arasynda bar ne joq ekendigi naqtylanyp otyrǵan joq.
Esterińize sala keteıik, 1 aqpan kúni Mysyrdyń Port-Saıd qalasynda ótken jergilikti «Ál Masrı» men kaırlyq «Ál Ahlı» komandalarynyń arasyndaǵy fýtbol matchy qaıǵyly oqıǵaǵa ulasty. Mysyrdaǵy ulttyq birinshiliktiń bas favorıti sanalatyn «Ál Ahlıdi» alań ıeleri 3-1 esebimen jeńse de, buzaqylar fýtbol alańyna júgirip shyǵyp, matchtyń berekesin ketirdi. Qyryq myńnan asatyn jankúıerler Kaırlyq klýbtyń jankúıerlerin jazym etip, nátıjesinde 74 adam mert boldy. Sonymen qatar, tártipsizdik kezinde 178 adam aýyr jaraqat alsa, japa shekkenderdiń jalpy esebi 1400-ge jetken.
