Egıpette 21 fýtbol buzaqysy ólim jazasyna kesildi
ASTANA. 10 naýryz. QazAqparat - Egıpet soty budan buryn 21 fýtbol buzaqysyna qatysty ólim jazasyna kesilgen úkimdi qýattady, dep habarlady RBK.
Olar 2012 jylǵy Port-Saıdta bolǵan tártipsizdikke qatysqany úshin aıyptalyp otyr. Sol kezde «Ál-Masrı» jergilikti klýbymen kaırlyq «Ál-Ahlı» arasyndaǵy match jappaı tóbelespen aıaqtalyp, 74 adamnyń ómirin qıǵan bolatyn.
Taǵy bes aıypty adamǵa keshe ómir boıy bas bostandyǵynan aıyrýǵa úkim shyǵaryldy. Qalǵanyna ártúrli merzimge túrmede otyrýǵa jaza taǵaıyndaldy. Іs boıynsha barlyǵy 73 adam jaýapqa tartyldy, olardyń 28-i aqtalyp shyqty, qalǵandary aıypty dep tanyldy.
2013 jylǵy qańtarda Port-Saıdta sot sottalǵan buzaqylarǵa eń joǵary jaza taǵaıyndaǵan bolatyn, alaıda bul oqıǵa úlken qoǵamdyq jańǵyryq týǵyzýyna baılanysty is Egıpettiń Joǵarǵy múftıine jiberilgen edi.
Sot úderisi kezinde fýtbol fanattary álsin-áli tártipsizdikter jasady. Sot úderisi bastalýy qalanyń naǵyz búligin týyndatty, sondyqtan da aýdanǵa armııa bólimderi ákelindi. Degenmen, polıtsııamen qaqtyǵystarda 30-ǵa tarta adam tártipsizdikter qurbany boldy.
Qaza bolǵandardy jerleý jańa tártipsizdik áreketterine ulasty, onyń barysynda sherýshiler polıtseı ýchaskesin órtep jiberdi. Ókimet oryndary yzaly egıpettik tobyrǵa qarý qoldanýǵa májbúr boldy. Atap óterligi, naq osy fýtbol fanattary ózderin Hosnı Múbarak rejımin qulatqan egıpet tóńkerisiniń qozǵaýshy kúshi dep sanaıdy. Olardyń kópshiligi Kaırdyń Tahrır alańyndaǵy aktsııalarǵa belsene qatysqan bolatyn.
