Egıpet Qarýly Kúshteriniń basshysy: El saıası ymyraǵa kelý jolyna tústi
ASTANA. 4 tamyz. QazAqparat - Egıpet saıası ymyraǵa kelý jolyna tústi, dep málimdedi búgin el armııasynyń basshysy general Abdel-Fattah ál-Sısı AQSh qorǵanys mınıstri Chak Heıgelmen telefon arqyly áńgimesinde.
«General ál-Sısı Egıpet bıligi burynǵysha konstıtýtsııa jasaý jáne elde saılaý ótkizý baǵytynda jumys jasap jatqanyn atap ótti», - dep habarlady Pentagon basshysynyń baspasóz hatshysy Djordj Lıttl. Sondaı-aq Egıpettiń áskerı kóshbasshysy AQSh memlekettik hatshysynyń kómekshisi Ýılıam Bernspen kezdesýdi kútip otyrǵanyn aıtqan. Atap óteıik, bunyń aldyndaǵy Ch.Heıgel men A. ál-Sısıdiń telefon arqyly áńgimesinde Pentagon basshysy generaldy saıası tutqyndaýdan jáne zorlyq-zombylyq jasaýdan aýlaq bolýǵa shaqyrdy, dep habarlady Associated Press.
Egıpettiń qarýly kúshteri 2013 jylǵy 3 shildede prezıdent Mohammed Mýrsıdi bılikten taıdyrǵanyn jáne konstıtýtsııa kúshin toqtatqanyn jarııalady. Egıpet armııasynyń bas qolbasshysy A. ál-Sısı tótenshe sharalardyń ulttyq kóshbasshy retinde M.Mýrsıdi qabyldamaǵan «halyq erkin» oryndaý dep túsindirdi. Elde jańa parlamenttik saılaý taıaýdaǵy alty aıdyń ishinde bolmaq. Odan keıin prezıdent saılaýy uıymdastyrylady.
