Egıpet halqy bir úzim nanǵa zar bolatyn kúıge tústi
ASTANA. QazAqparat - Egıpet ekonomıkalyq daǵdarystyń az-aq aldynda tur. Óıtkeni eldiń negizgi tabys kóziniń biri sanalatyn týrıstik sala turalady.
Oǵan qosa Sýets arnasynan túsetin tabys azaıdy. Ótken jyldan beri mundaǵy ınflıatsııa kólemi 30 paıyzǵa ósti. Saldarynan azyq-túlik tapshylyǵy baıqalyp, baǵasy sharyqtady. Mysyrdaǵy saýdasy qaınap jatatyn azyq-túlik satatyn iri bazarlardyń birinde búginde adamnyń qarasy az. Óıtkeni sońǵy birneshe aıdyń ishinde baǵa 40 paıyzǵa qymbattady. Al turǵyndardyń ony satyp alatyn aqshasy joq. Ekonomıkalyq qıyndyqtarmen birge áleýmettik ahýal da nasharlady. Jastardyń kóbi eki qolǵa bir kúrek tappaı júr.
«Bir kún ash, bir kún toqpyz. Jumys, aqsha degendi suramaıtyn da boldyq. Bılik jumys bere almasa, tamaq berip asyrasyn. Bir úzim nan alyp jeı almaıtyn kúıge tústik», - deıdi Kaır turǵyny Mahmýd Abýlhassan.
Ótken jyldyń kúzinde Mysyrdyń Ortalyq banki jaǵdaıdy túzeý úshin ulttyq aqshasyn devalvatsııalady. Bul Kaırge Halyqaralyq valıýta qorynan 12 mıllıard dollar nesıe alýǵa múmkindik berdi. Oǵan qosa bılik ekonomıkany turaqtandyryp, ınvestorlardyń senimine kirýdi kózdedi. Degenmen is júzinde qarapaıym halyqtyń tabysy azaıdy.
Al Azyq-túlik qaýipsizdigin baqylaıtyn maman Dına Behıttiń aıtýynsha, eldegi bul jaǵdaı áli de jalǵasa beretin bolady.
«Árıne, azyq-túlik tapshylyǵy áli de jalǵasa beredi. Óıtkeni óndiris suranysty qamtamasyz ete almaıdy. Halyqtyń sany jyl saıyn kóbeıip jatyr. Al aýyl sharýashylyǵynyń jerleri kerisinshe, kemip keledi», - deıdi ol.
Egıpet ekonomıkasyna eleýli úles qosyp kelgen týrızm salasy sońǵy on jyldaǵy eń qıyn kezeńdi ótkerip jatyr. Saıahatshylardyń sıreýine 2015 jyly reseılik ushaqtyń apatqa ushyraýy sebep boldy. Sodan beri munda keletin týrısterdiń legi 70 paıyzǵa azaıdy.
Derekkóz: «Habar 24» arnasy.
