Egıpet Gaza sektorymen shekaradaǵy pýnktti japty
Izraıl Egıpettiń Gaza sektorymen shekaradaǵy «Rafah» baqylaý-ótkizý pýnkti jabyq ekenin málimdedi, dep habarlaıdy Kazinform.
VVS agenttiginiń jazýynsha, Izraıl qorǵanys áskeri Gaza sektorynan ketýdi qalaǵan palestınalyqtarǵa jasaǵan usynysyn ózgertti. Buǵan deıin Izraıl áskeri palestınalyqtarǵa Egıpet baqylaıtyn jalǵyz ótý pýnkti arqyly ketýdi usynǵan. Qazir bul jer jabylǵan. Gaza sektory men Egıpet shekarasyndaǵy «Rafah» baqylaý-ótkizý pýnkti aýmaǵyna áýeden soqqy jasalǵany belgili. Sonymen qatar Dúnıejúzilik densaýlyq saqtaý uıymy (DDSU) Gaza sektoryndaǵy dári-dármek bitkenin málim etti.
HAMAS basyp kirgeli DDSU-nyń 13 nysanyna shabýyl jasalǵan.
Senbi kúni palestınalyq HAMAS toby Izraılge shabýyl jasap, el soǵys jaǵdaıyna kóshkennen keıin birqatar memleket azamattaryn Izraılden evakýatsııalaýdy uıymdastyrǵanyn eske sala keteıik.
Izraıl áskeriniń resmı ókili dúısenbi tańerteń qazirgi ýaqytta barlyq eldimekendi baqylap otyrǵanyn, Izraıl aýmaǵynda áskerı is-qımyl bolyp jatpaǵanyn málim etti. Degenmen ol Izraıl aýmaǵynda áli de Hamas áskeri bar bolýy múmkin deıdi.
Keshe HAMAS Tel-Avıvtegi áýejaıǵa zymyran ushyrǵany belgili boldy. Sondaı-aq Izraıl qorǵanys mınıstri Ioav Gallant Gazanyń tolyq oqshaýlanǵanyn málim etti. Ol jaqta jaryq, tamaq jáne otyn joq.
Qazirgi ýaqytta Izraıl áskeri Gaza sektoryndaǵy HAMAS bekinisine shabýyldy jalǵastyryp jatyr. Áskerıler Palestına turǵyndaryna Egıpetke qashýdy usyndy.
Arab memleketteri lıgasy Gaza sektoryndaǵy jaǵdaıǵa baılanysty 11 qazanda shuǵyl jıyn ótkizetini belgili boldy.