Egıpet bıligi: A321 bortynyń «qara jáshigindegi» jazýlar bóten shýdy tirkedi
ASTANA. QazAqparat - Egıpette apatqa ushyraǵan reseılik A321 ushaǵynyń bortyndaǵy «qara jáshiktegi» sońǵy sekýndtardaǵy jazbalardan bóten shý estildi, dep málimdedi laınerdiń apatqa ushyraýynyń sebepterin tekserip jatqan halyqaralyq komıssııanyń basshysy Aıman ál-Múkkadam.
Apatqa ushyraǵan reseılik A321 qırandylary Kaırge qaýipsiz jerge jetkizildi, dedi ol. Ol sondaı-aq eki «qara jáshik» te apattyń alǵashqy kúni tabylǵanyn aıtty. Komıssııa basshysynyń aıtýynsha, ushaq bólshekteri aýmaǵy 12 shaqyrym jerge shashylǵan, olardyń barlyǵy birdeı tabylǵan joq.
Tabylǵan qırandy bólshekteri ázirge ushaqqa áser etý sıpatyn anyqtaýǵa múmkindik bermeı tur, dedi ol.
Egıpet bıliginde ázirshe reseılik ushaqtyń apatqa ushyraýy sebepteriniń naqty nusqasy joq, oqıǵanynyń múmkin bolǵan barlyq stsenarııleri qarastyrylýda, dep habarlady Bı-bı-sı.
Qazirgi kezde tergeý aqparattar jınaýdy jalǵastyrýda, dedi ál-Múkaddam.
Eske sala keteıik, reseılik «Kogalymavıa» avıakompanııasynyń Airbus A321 ushaǵy 31 qazanda Sınaı túbeginde apatqa ushyrady. Borttaǵy barlyq 224 adam qazaǵa ushyrady.
