«Eginjaı» baǵdarlamasy boıynsha kóktemgi dala jumystaryn nesıelendirý bastaldy

ASTANA. QazAqparat - «QazAgro» Ulttyq basqarýshy holdınginiń enshiles kompanııasy - Aýyl sharýashylyǵyn qarjylaı qoldaý qory «Eginjaı» baǵdarlamasy boıynsha agroónerkásip kesheni sýbektilerine kóktemgi dala jumystaryna nesıeler bere bastady, dep habarlady kompanııanyń baspasóz qyzmetinen.

Baǵdarlama 2010 jyly ashylyp, shaǵyn jer telimderi bar fermerlik sharýashylyqtardy, sharýa qojalyqtaryn, jeke azamattardy qoldaýǵa baǵyttalǵan. Úsh jyldyń ishinde Aýyl sharýashylyǵyn qarjylaı qoldaý qory 2,7 mlrd. teńgege 1 myńnan astam jobany óz qarajatynan qarjylandyrdy. Sonymen qatar, tartylǵan qarajattan maqta ósiretin aýyl sharýashylyq taýar óndirýshilerine «Yrys» shaǵyn nesıe uıymy arqyly 1 mlrd. teńge bólindi.

AÓK sýbektilerin qoldaý kelesi talaptarmen júzege asyrylýda: nesıeniń somasy - 6 mln. teńgege deıin, jyldyq syıaqy ústemesi - 9,5%, tıimdi syıaqy ústemesi - 10,2% deıin. Nesıeni qaıtarý eki maýsym astyǵyn satýdan keıin qarastyrylǵan, bul aýylsharýashylyq taýarlaryn óndirýshiler úshin óte mańyzdy jeńildik. Qazaqstannyń ońtústik aımaqtaryndaǵy sharýalar jaqyn arada egistik naýqandy bastaýǵa daıyn. Qordyń Ońtústik Qazaqstan fılıaly «Eginjaı» baǵdarlamasy boıynsha naýryzdyń birinshi kúnderi 8,5 mln. teńgege 2 jobany qarjylandyryp, taǵy 2 ótinimdi qarastyrýda. Aǵymdaǵy jyly oblysta kóktemgi dalalyq jáne kúzgi jıyn-terim jumystaryna 50 mln. teńge baǵyttalady dep josparlandy. Jalpy 2014 jyly aýylsharýashylyǵyn qarjylaı qoldaý qory tarapynan kóktemgi dalalyq jáne kúzgi jıyn-terim jumystaryna 1,6 mlrd. teńge bólý kózdelip otyr.