Eginnen mol ónim alǵan aýdandarǵa 50 mln teńgeniń sertıfıkattary tapsyryldy - SQO
PETROPAVL. QazAqparat - Soltústikqazaqstandyq dıqandar aýyl sharýashylyǵy qyzmetkerleriniń tól merekesin atap ótti. Oblys ákimi Qumar Aqsaqalov oraq naýqanyn jaqsy aıaqtaǵan aýdandarǵa 10, 20 jáne 30 mln teńgeniń sertıfıkattaryn tapsyrdy, dep habarlaıdy QazAqparat.
Astyqty óńir bıylǵy jyldy tolaǵaı tabystarmen aıaqtaǵaly otyr. 10 aıdyń qorytyndysy boıynsha, aýyl sharýashylyǵynyń jalpy ónimi 464 mlrd teńgeni qurady. Agrarlyq salaǵa 61 mlrd teńge ınvestıtsııa quıyldy. 5,3 mln tonna bıdaı qambaǵa salyndy. Dıqandar bıyl ár gektardan orta eseppen 18,2 tsentnerden ónim alsa, bıylǵy kórsetkish - 19 tsentner. Maıly daqyldardyń alqaby ulǵaıyp, 1 mln ga jetti. 1 mln tonna maıly daqyl jınaldy.
Elbasy N.Nazarbaevtyń tapsyrmasymen SQO-nyń aldaǵy 3 jyldaǵy damýynyń keshendik jospary jasaldy. Bul baǵdarlama aýyl sharýashylyǵy salasynyń birqatar máselesin sheshýge kómektespek. Máselen, bilikti kadrlardy tartý úshin eldi mekenderde 3000 baspana salynady.
«Kelesi jyly aýyldy jerlerde 600 úı turǵyzamyz. Oǵan qajetti qarajat bıýdjetke josparlandy. 2019 jyly taǵy da 1000 baspana aýyldyqtarǵa beriledi, al 2021 jyly 1400 úıdiń qurylysyn aıaqtaımyz. Osylaısha biz Elbasynyń saıasatymen eldi meken turǵyndaryna jaǵdaı jasaımyz. Aýyldan kóship jatqandardyń sanyn qysqartyp, óndiris kólemin arttyramyz. Sol sebepti aýyl sharýashylyǵy kásiporyndarynyń jetekshilerin turǵyn úı qurylysyna belsendi qatysýǵa shaqyramyn. Memleket ol úılerdi satyp alady»,- dedi oblys ákimi Qumar Aqsaqalov.
Óńir jetekshisiniń aıtýynsha, keıbir sharýalar qunarly jerdi tıisinshe paıdalanbaı keledi. Nashar ónim alǵan dıqandardyń alqaptary jerde jumys isteı biletin sharýalarǵa bólinip berilmek.
«Bul - sol jerde turyp jatqan aýyldyqtar úshin jasalady. Óıtkeni olar fermerge bergen jerinen paıda kórýleri kerek. Al, gektarynan 7-8 tsentner ónim alatyndarda qandaı kiris bolýy múmkin»,- deıdi Qumar Aqsaqalov.
Oraq naýqanynyń nátıjesi boıynsha ár gektardan orta eseppen 21 tsentnerden astyq jınaǵan Aqqaıyń aýdanyna oblys ákimi 10 mln teńgeniń, gektarynan 23,4 tsentner bıdaı alǵan Jambyl aýdanyna 20 mln teńgeniń sertıfıkattary tabystaldy. Al, kósh bastaǵan Qyzyljar aýdanyna óńir basshysy 30 mln teńgeniń sertıfıkatyn tapsyrdy.
Sondaı-aq saltanatty jıyn barysynda birqatar aýyl eńbekkerlerine adal eńbegi jáne kásibı sheberligi úshin medaldar men gramotalar tabys etildi.
