Egin jınaý jumystaryna bólingen dızel otynynyń quny 15 paıyzǵa arzan - mınıstr

ASTANA. QazAqparat – Egin jınaý jumysyna 426 myń tonna arzandatylǵan dızel otyny bólindi. Bul týraly Úkimet otyrysynda Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Aýyl sharýashylyǵy taýaryn óndirýshiler egin jınaý jumystaryn ýaqtyly júrgizý úshin 426 myń tonna arzandatylǵan dızel otyny bólindi. Onyń ishinde 58 myń tonna azyq daıyndaý jumystaryn júrgizý úshin berildi. Dızel otynynyń bul kólemi Energetıka mınıstrligimen kelisilip, bekitilgen. Barlyq shyǵystardy eskere otyryp, aýyl sharýashylyǵy taýaryn óndirýshiler úshin ortasha baǵa lıtrine 250 teńgeni quraıdy, bul naryqtyq baǵadan 15%-ǵa tómen», - dep toqtaldy Erbol Qarashókeev.

Eske salaıyq, bıyl 24 mln gektar alqaptan aýyl sharýashylyǵy daqyldary jınalady. Búginde onyń 2,4 mln gektarynan ónim alyndy.