Egin jınaý naýqany óte qıyn jaǵdaıda ótip jatyr – AShM
Ortalyq kommýnıkatsııalar qyzmetinde ótken baspasóz máslıhatynda QR Aýyl sharýashylyǵy birinshi vıtse-mınıstri Aıdarbek Saparov osylaı dedi, dep habarlaıdy QazAqparat tilshisi.
«Ózderińiz biletindeı, 20 tamyzda egin jınaý naýqanyna kiristik. Jalpy, 25 tamyzdan bastap búkil óńirler bul jumysty bastap ketken bolatyn. Egin jınaý naýqany qıyn jaǵdaıda ótip jatyr. Shyndyǵyn aıtý kerek. Barlyǵy aýa-raıy jaǵdaıyna baılanysty. Sebebi, Soltústik Qazaqstan, Aqmola, Qostanaı oblystaryn alar bolsaq, ol óńirlerde 12-15 kún boıy jaýyn jaýdy. Kúnara jańbyr jaýǵan kezder boldy», - dedi vıtse-mınıstr.
Aıdarbek Saparovtyń aıtýynsha, áıtse de, egin jınaý baǵytynda memleket tarapynan barlyq jaǵdaılar jasalǵan.
«Birinshiden, janar-jaǵarmaı 100 paıyz berildi. Keste boıynsha aı saıyn tapsyryldy. Tehnıka daıyn. Barlyǵy jóndeýden ótken. Sharýashylyq basshylary jumysty barynsha joǵary deńgeıde júrgizip jatyr. Jalpy, aýa raıy ashylsa, 10-12 kúnniń ishinde egin jınaý naýqanyn aıaqtaımyz», - dedi ol.
Vıtse-mınıstrdiń aıtýynsha, oblystar bergen málimet boıynsha qazirgi ýaqytta elimizdegi egin alqabynyń 12,4 mln gektary – 81,4 paıyzy orylyp qoıǵan.