Egin oraǵy kezinde fermerlerge dızel otyny tómen baǵamen ótkiziledi
Energetıka mınıstrliginiń málimetinshe, Aýyl sharýashylyǵy mınıstrliginiń jáne jergilikti atqarýshy organdardyń ótinimderi negizinde 2023 jylǵy kúzgi egin oraǵyna fermerlerge 426 myń tonna dızel otyny bólindi. Atap aıtqanda, Energetıka mınıstrligi otyndy aýyl sharýashylyǵy taýaryn óndirýshiler úshin 284 myń teńge/tonna somasynda usyndy. Bul rette munaı óńdeý zaýytyndaǵy baǵa 1 lıtrine 239 teńgeden eseptelip otyr. Degenmen, jetkiziletin óńirdiń qashyqtyǵyna jáne óńirlik operatorlardyń shyǵyndaryna qaraı, fermerler úshin ortasha baǵa 1 lıtrine shamamen 257 teńge boldy.
«Qazirgi kezde janar-jaǵarmaı quıý stantsııalaryndaǵy dızel otynynyń shekti bólshek baǵasy 1 lıtrine 295 teńge shamasynda. Jalpy, bólshek saýda quny (295 teńge/lıtr) men aýyl sharýashylyǵy taýarlaryn óndirýshilerge kúzgi kezeńge arnalǵan dızel otynynyń baǵasy (257 teńge/ lıtr) arasyndaǵy aıyrmashylyq 14,8 % (shamamen 38 teńge jeńildik) boldy», - delingen mınıstrlik habarlamasynda.
Qazaqstanda egin oraǵy shilde aıynan bastap qarasha aıyn qosa alǵandaǵy ýaqytty qamtıdy. Shilde aıynda dızel otynyn jetkizetin óńirlik operatorlar kúzgi egin oraǵyna bólingen kólemniń tek 4,5 myń tonnasyn nemese 1 paıyzyn jóneltti.
Erejege sáıkes jergilikti atqarýshy organdardyń komıssııalary fermerlerge dızel otynyn jetkizetin óńirlik operatorlardy aıqyndaıdy. Komıssııa quramyna ákimdikterdiń, prokýratýra organdarynyń (kelisim boıynsha), sybaılas jemqorlyqqa qarsy is-qımyl organdarynyń (kelisim boıynsha), qoǵamdyq uıymdardyń, «Atameken» UKP óńirlik kásipkerler palatasynyń jáne jeke kásipkerlik sýbektileri birlestikteriniń ókilderi kiredi.
