Egin oraǵy 90 paıyz alqapta aıaqtaldy, astyq ónimi 24 mln. tonnadan asyp jyǵylady - Aýyl sharýashylyǵy mınıstri
TANA. 10 qazan. QazAqparat /Qanat Mámetqazyuly/ - Oblys ákimdikteriniń málimetterine sáıkes qazirgi kezde elimizdegi astyq ónimi 24 mln. tonnadan asyp ketti. Onyń ishindegi bıdaı 20,2 mln. tonnany qurap otyr. Osyǵan oraı taza salmaqtaǵy astyq ónimi 22-23 mln. tonna deńgeıinde boljanýda.
Aldyńǵy jyldarmen salystyrǵanda mundaı ónim kólemi rekordtyq bolyp tabylady. Búgin Parlament Májilisinde ótip jatqan Úkimet saǵatynda aýyl sharýashylyǵy mınıstri Asyljan Mamytbekov osylaı málimdedi.
Mınıstrdiń sózine qaraǵanda, bıylǵy jyly elimizdiń agrarlyq salasynda eginniń 1 gektardan túsetin shyǵymdyq bóliginde táýelsizdikten beri qaraıǵy rekordtyq astyq ónimi kútilýde. Mundaı ónim alýǵa aǵymdaǵy jyly qalyptasqan qolaıly aýa raıy septigin tıgizgen. «Budan bólek Elbasynyń maqsatty agrarlyq saıasatyna sáıkes táýelsizdikten bergi kóptegen jyldar boıynda salany júıeli túrde memlekettik qoldaýda osyndaı rekordtyq kórsetkishke jetelep otyr. Óıtkeni, dál bıylǵydaı aýa raıynyń qolaılylyǵy budan buryn da, máselen 1999-2001 jyldary da bolǵan. Alaıda sol kezderi aýyl sharýashylyǵynda jaqsy tuqym bolmady, ońtaıly merzimde egin seýip, jınaýǵa múmkindik beretin ónimdiligi joǵary tehnıkany, tyńaıytqyshtar men gerbıtsıtter qoldanýdyń búgingideı deńgeıi de bolǵan joq», - dedi mınıstr.
Onyń sózine qaraǵanda, aǵymdaǵy jyly kóktemgi dala jáne egin oraǵy jumystaryna bıýdjetten jáne «QazAgro» holdınginiń enshiles uıymdarynan 94,4 mlrd. teńge bólingen. Onyń ishinde 78 mlrd. teńge bıýdjettik nesıe bolyp tabylady. Al, tıimdi syıaqy mólsherlemesi jyldyq 12 paıyzdan 8 paıyzǵa deıin tómendetilgen.
«Qazirgi tańda egin oraǵy 90 paıyz alqapta aıaqtaldy. Astyqtyń ortasha túsimdiligi gektaryna 16,5 tsentnerdi quraýda. 1,6 mln. gektar dándi-daqyldar onyń ishinde 1,3 mln. gektar bıdaı aldaǵy ýaqytta jınalady», - dedi A. Mamytbekov.
