Egeýquıryq ýy tabylǵan HiPP ónimi elde satyla ma

ASTANA. KAZINFORM — Sanıtarııalyq-epıdemıologııalyq baqylaý komıteti HiPP balalar taǵamynan egeýquıryq ýy tabylǵany týraly aqparatty tekserdi.

— Germanııada óndirilgen HiPP balalar taǵamynan egeýquıryq ýy anyqtalǵany týraly BAQ-taǵy jarııalanymdarǵa baılanysty komıtet mynany habarlaıdy: atalǵan zań buzý týraly aqparat Eýropalyq odaqtyń quzyretti organdarynan Azyq-túlik pen jemshóptiń sapasy boıynsha jedel habarlaý júıesi (RASFF), sondaı-aq DDSU-nyń Azyq-túlik qaýipsizdigi jónindegi halyqaralyq organdar jelisi (INFOSAN) arqyly kelip túsken joq.

Atalǵan ónim Eýrazııalyq ekonomıkalyq odaqtyń memlekettik tirkeý týraly kýálikteriniń Biryńǵaı tiziliminde tirkelmegen, osyǵan baılanysty ony Qazaqstan aýmaǵynda jáne EAEO-nyń basqa elderinde satýǵa ruqsat etilmeıdi, — delingen habarlamada.

Komıtet tarapynan ónimniń yqtımal satylýyn anyqtaý boıynsha tıisti is-sharalar júrgizilip jatyr.

— Komıtettiń aýmaqtyq bólimsheleri júrgizgen monıtorıng nátıjeleri boıynsha atalǵan ónim eldiń saýda oryndarynda anyqtalǵan joq.

Ónim satylymda anyqtalǵan jaǵdaıda azamattardan jedel sharalar qabyldaý úshin Komıtettiń aýmaqtyq bólimshelerine habarlasýdy suraımyz, — delingen habarlamada.

Aıta ketelik Avstrııada Hipp balalar taǵamynan egeýquıryq ýy tabylǵany týraly jazǵan edik.