Eger Golovkın bárin birinshi raýndta sulatyp sala berse, qarsylas tabýy qıynǵa soǵady - Dmıtrıev
ASTANA. QazAqparat - Gennadıı Golovkınniń alǵashqy jattyqtyrýshysy Vıktor Dmıtrıevtiń pikirinshe, qazaqstandyq boksshy amerıkandyq Vıllı Monromen jekpe-jekti shoý úshin altynshy raýndqa deıin sozǵan, dep habarlaıdy Vesti.kz.
«Bizdiń jeńisimizge qýanyshtymyn. Qaraǵandynyń abyroıy úshin, Qazaqstannyń abyroıy úshin Gena tura aldy, naǵyz azamat. Ol ekinshi raýndta-aq kezdesýdiń núktesin qoıa alar edi. Biraq Gena alty raýndqa jalǵastyrdy. Bul durys. Eger bárin alǵashqy raýndta sulatyp sala berse, oǵan qarsylas tabý qıyndaı túser edi Al jankúıerler shoý kórgisi keledi. Gena olardyń bul tilegin oryndady»,-deıdi Vıktor Dmıtrıev.
Eske sala keteıik, búgin Gennadıı Golovkın Kalıfornııada amerıkalyq boksshy kishi Vıllı Monrony tehnıkalyq nokaýtpen jeńdi.
Bul - qazaqstandyq boksshynyń kásibı sharshy alańdaǵy 33-shi jeńisi jáne mereıtoılyq 30-shy nokaýty.
