Eger biz tildiń kósegesin kógertemiz desek, til týraly tek qana shyndyqty aıtýymyz kerek - A.Smaıyl
ASTANA. Qyrkúıektiń 3-i. QazAqparat /Marlan Jıembaı/ - Eger biz tildiń kósegesin kógertemiz desek, til týraly tek qana shyndyqty aıtýymyz kerek. Bul pikirdi búgin elorda ákimdiginde Tilderdi qoldaný men damytýdyń 2011-2020 jyldarǵa arnalǵan memlekettik baǵdarlama jobasyn qoǵamdyq talqylaýda QR Parlamenti Májilisiniń depýtaty Aldan Smaıyl bildirdi.
«Men sońǵy jyldary qazaq tiliniń kósegesi kógerdi, mereıi ústem boldy degenge qosylmaımyn. Sebebi, kórip otyrsyzdar qaı jerge barsańyzdar da qazir jınalystardyń barlyǵy negizinen orys tilinde júredi. Úkimet qazaqsha sóılegen joq. Qalalyq ákimdikterdiń barlyǵy birdeı jınalystaryn qazaq tilinde ótkizedi dep eshkim aıta almaıdy. Jalpy qazaq tiline degen oń kózqaras halyqtyń ózinde bar, al sheneýnikterde joq», dedi ol óz sózinde.
Sonymen qatar halyq qalaýlysy bul baǵdarlamadan qazaq tilin endigi 10 jylda burynǵydan da jedel damytatyn baptardy, taraýlardy kútkendigin atap ótip, ondaǵy jańalyqtarǵa toqtaldy. Onyń atap ótýinshe, baǵdarlamadaǵy qazaq tilin oqytýdyń biryńǵaı standarttyn engizý, memlekettik tildi balabaqshadan, sondaı-aq mektepten JOO-ǵa deıin oqytý, memlekettik qyzmetkerlerdiń tilin syndyrý syndy máseleler jańalyq emes. Bulardyń barlyǵy da júzege asyryla bastaǵan jáne júzege asyrylyp jatqan sharalar.
Sóz oraıynda qazaq tiliniń damýyna jan-tánimen tilektes ekendigin atap ótken A.Smaıyl «biraq tilektes bolý bir nárse, shyndyqty aıtý ekinshi nárse. Eger osynyń barlyǵynyń basyn ashyp aıtpaıtyn bolsaq, dál sol kemshilikterdi joıýdyń naqty jolyn mynaý baǵdarlamadan tappaıtyn bolsaq, biz taǵy da 10 jyldy bostan-bosqa joǵaltamyz», dedi.
