«Eger biz birligimizden jazbasaq, bul daǵdarystan da ótetin bolamyz» - respýblıkalyq basylymdarǵa sholý
ASTANA. Qarashanyń 14-i. /QazAqparat/ - Qazaq aqparat agenttigi respýblıkalyq basylymdarda qarashanyń 14-i, senbi kúni shyqqan ózekti materıaldarǵa sholýdy usynady.
Keshe QR Prezıdenti Nursultan Nazarbaev qazaqstandyqtardyń saýaldaryna tikeleı jeli arqyly jaýap bergen bolatyn. Osyǵan oraı «Aıqyn» gazetiniń senbilik sanynda «Halyqtyń qurmeti maǵan qýat beredi» degen taqyryppen Elbasynyń tikeleı jeli barysynda bergen jaýaptary jaryq kórdi. Basylymnyń jazýynsha, teleefır, telefon, ınternet jáne SMS habarlamalary arqyly 34 myń saýal kelip túsken. Tikeleı jeli bastalysymen «Búgingideı búkil álemdi jaılaǵan daǵdarys eshqashan bolǵan emes. Álemdik ekonomıkanyń oǵan qarsy kúres shyǵyndary 12 trıllıon dollardy quraıdy. 230 mıllıon adam jumyssyz qaldy. Barlyq transulttyq kompanııalardyń jartysy sátsizdikke ushyrady. Olardyń 30 paıyzy óz aktıvterin satý jóninde másele qoıýǵa májbúr boldy. Qazaqstan osyndaı jaǵdaıda jumys istedi. Degenmen bizdiń halqymyz bul daǵdarysty onsha sezingen joq. Sebebi, men barlyq aımaqtarda bolyp, turǵyndarmen tildesip júrgendikten, jalpy jaǵdaıdy bilemin. Munyń bárine elimizdiń qýaty, múmkindigi jáne qorlarynyń arqasynda qol jetti jáne biz qıyndyqtardan jaman ótpedik», degen Memleket basshysynyń sózi keltirilgen.
Elbasynyń tikeleı jeli arqyly qazaqstandyqtardyń saýaldaryna bergen jaýabyna oraı «Astana aqshamy» basylymynda da maqala jaryq kórdi. Jarııalanym «Eger biz birligimizden jazbasaq, bul daǵdarystan da ótetin bolamyz» degen ataýmen berilgen.
Sonymen qatar, tikeleı jeli barysy «Lıter», «Ekspress K», «KP-Kazahstan» basylymdarynda da egjeı-tegjeıli jazylǵan. «Lıter» gazeti birinshi bette Prezıdentke qoıylǵan reıtıngi eń joǵary 3 suraqty jarııalaǵan. Olar: balalardy balabaqshaǵa ornalastyrý problemasy, «Qýat» korporatsııasynyń úleskerlik qurylys nysandary jáne Memleket basshysynyń qandaı ishimdikti joǵary baǵalaıtyndyǵy týraly bolǵan.
«Aıqyn» basylymynyń dástúrli «Aq sóıle!» aıdarynyń senbilik qonaǵy - Ulttyq banktiń tóraǵasy Grıgorıı Marchenko. Basylymnyń salmaqty saýaldaryna jaýap bergen bank tóraǵasynyń aıtýynsha, teńgeniń aýytqý dálizi 2010 jyly keńeıtiledi, bul rette dálizdiń ortalyq máni 1 AQSh dollary úshin 150 teńge deńgeıinde qalady eken. Ekeýara áńgime «Tól teńge tózimdilik tanytty» degen taqyryppen jarııalanǵan.
«Qazirgi ýaqytta qalada da, dalada da ne kóp?... Janar-jaǵarmaı quıý beketteri kóp. Bul árıne, jaqsy-aq. Óıtkeni jolǵa shyqqan kólik júrgizýshisi esh qıyndyqsyz qalaǵan janarmaıdy kóligine quıyp alyp, saparyn odan ári jalǵastyra beredi. Degenmen sol qaptaǵan maı quıý beketterindegi janarmaıdyń sapasy talapqa saı ma? Mine, gáp sonda! Sondyqtan da Almaty qalalyq ákimdiginiń Tabıǵı resýrstar jáne tabıǵatty paıdalanýdy retteý basqarmasy janarmaı quıý beketteri men munaı bazalaryna jetkiziletin avtokólik janarmaılary sapasynyń qanshalyqty talapqa saı ekendigine únemi monıtorıng júrgizip otyrady», dep jazady «Aıqyn» gazeti. Atalǵan jaıt tóńiregindegi túıtkilderdiń egjeı-tegjeıin osy basylymda jaryq kórgen «Janar-jaǵarmaı, al sapasy qandaı?» degen maqaladan oqı alasyzdar.
***
Qarashanyń 12-de Astanadaǵy «RІXOS» qonaqúıiniń májilis zalynda Elbasy Nursultan Nazarbaev Qazaqstan Respýblıkasy Prezıdentiniń «Altyn sapa» syılyǵyna usynylǵan konkýrs jeńimpazdaryn marapattaǵan bolatyn. Osy aıtýly sharaǵa oraı «Astana aqshamy» basylymynyń senbilik nómirinde «Altyn sapa» - básekege qabiletti ónimniń belgisi» degen taqyryppen maqala jaryq kórdi.
«Altyn sapa» jeńimpazdaryn marapattaý rásimi «Vechernıaıa Astana» basylymynyń da nazarynan tys qalmaǵan.
«Astana aqshamy» gazetiniń jazýynsha, elordada jańa jyl meıramyna daıyndyq jumystary bastalypty. Osy oraıda, qaladaǵy mekemeler men ǵımarattardy bezendirý jáne kóshelerde jańajyldyq shyrshalardy ornatý jumystary qolǵa alynbaq.
Osy basylymda «Er kezegi úshke deıin» degen taqyryppen sport sańlaǵy Ashat Jıtkeev jaıyndaǵy kólemdi maqala shyqty. Onda dzıýdo kúresiniń maıtalmannyń ómir jolyna sholý jasalǵan. Maqala «ııa, ııa, ózińe rıza bol, sen elińe sport baqytyn syılaǵan sańlaqsyń deımiz biz de Qazaqstan dzıýdosyna jańa tarıhtyń betin qosqan, Olımpıada oıyndarynyń tuńǵysh júldesin alǵan Ashat balýanǵa. Seniń kúmisiń qazaq dalasyna, qazaq balasyna dzıýdo kúresiniń qudiretin tanytty. Kımono izdep, boz kilemge baratyn jasóspirimder kóbeıdi. Úlken jolǵa iz saldyń, Ashat chempıon. Endi sol iz alǵa tartsyn», dep túıindelgen.
***
«Ekspress K» gazetiniń jazýynsha, UQK ókili Almaty qalalyq qarjy polıtsııasy bastyǵynyń orynbasary Aıdyn Janteleevtiń esirtkini paıdalanýǵa, satyp alýǵa jáne saqtaýǵa qatysty bar ekendigin dáleldeıtin bultartpas aıǵaq tergeýshilerdiń qolynda turǵandyǵyn habarlaǵan.
«Astana EQYU-ǵa basshylyq jasaýǵa daıyndalýda». Osy taqyryppen «KP - Kazahstan» gazetinde jaryq kórgen maqalada EQYU hatshylyǵynyń joǵary laýazymdy delegatsııasynyń qazaqstandyq saıasatshylarmen kezdeskendigi jaıynda jazǵan. Basylymnyń jazýynsha, QR Syrtqy ister mınıstri Qanat Saýdabaevpen kezdesken EQYU hatshylyǵynyń Bas hatshysy Mark Perren de Brıshambo 2010 jyly EQYU men Qazaqstan kóptegen ózekti máselelerdi sheshe alatyndyǵyna, sonymen qatar bolýy múmkin daǵdarystyq jaǵdaılarǵa toıtarys beretindigine senim bildirgen.
