Eger bala shetelde týǵan bolsa, onyń qujattaryn qalaı rásimdeý kerek

ASTANA. KAZINFORM — Qazaqstan azamattarynyń shetelde týǵan balalaryn tirkeý Qazaqstan Respýblıkasynyń sheteldegi mekemeleri arqyly nemese QR aýmaǵyndaǵy tirkeý organdarynda — ata-analardyń nemese olardyń bireýiniń tańdaýy boıynsha júrgizilýi múmkin, dep habarlaıdy Kazinform tilshisi. 

Bul týraly Qazaqstan Respýblıkasynyń Ádilet mınıstrligi eske saldy.

«Neke (erli-zaıyptylyq) jáne otbasy týraly» Kodeksine sáıkes týýdy tirkeý úshin kelesi qujattardyń birin usyný qajet: 

● týý týraly kýáliktiń túpnusqasy, 
● týý týraly aktiniń kóshirmesi,
● týý týraly medıtsınalyq kýáliktiń túpnusqasy.

Eger ata-anasynyń nekesi shetelde qıylǵan bolsa, neke týraly kýálik te qajet bolady.

Bala týǵannan keıin eki aıdan keshigip ótinish berilgen jaǵdaıda, keshiktirý sebebin kórsetetin túsindirme hat qosa berilýi tıis.

Ótinishti qaǵaz túrinde nemese elektrondy túrde eGov.kz portaly arqyly berýge bolady, bul ásirese shetelde júrgender úshin yńǵaıly. Qyzmet onlaın-ótinish bergen jaǵdaıda 3 jumys kúni ishinde jáne jeke ótinish bergende 5 jumys kúni ishinde kórsetiledi.

Buǵan deıin el azamattyǵynan qansha adam bas tartqanyn jazǵan bolatynbyz.