«Egemenniń qara nary» atanǵan Erjuman Smaıyl ómirden ozdy
ASTANA. QazAqparat - Prezıdent syılyǵynyń tuńǵysh laýreaty, Qazaqstannyń eńbek sińirgen qaıratkeri «Egemen Qazaqstan» gazetinde bas redaktor qyzmetin atqarǵan Erjuman Smaıyl ómirden ozdy, dep habarlaıdy «QazAqparat» HAA tilshisi.
Qaıǵyly qaza týraly «Egemen Qazaqstan» AQ basqarmasynyń tóraǵasy Darhan Qydyráli Feısbýktegi paraqshasynda jazdy.
«Egemen Qazaqstan» ujymy búgin aýyr qaıǵyǵa ushyrady. El gazetin eki ret basqarǵan, «Egemenniń qara nary» atanǵan Er-aǵa - Erjuman aǵa Smaıyl bu fánıden baqıǵa attanǵany týraly sýyt habar estidik. Kóńil qurǵyr sene almaıdy. Jyl basynda egemendikter Er-aǵanyń 70 degen mereıli jasyn arnaıy atap ótip edi. Birer kún buryn ǵana bir dastarxan basynda bas qosyp, arqa-jarqa áńgimelesip edik. Qaraly xabardy estip, eseńgirep qaldyq. Marqumnyń otbasyna, balalaryna, jaqyndaryna kóńil aıtamyz. Aǵamyzdyń ımany joldas bolsyn! Baqul bol, aǵa!» - dep jazady Darhan Qydyráli.
Erjuman Smaıyl eńbek jolyn «Sotsıalıstik Qazaqstan» (qazirgi «Egemen Qazaqstan») gazetiniń tilshisi bolyp bastaǵan. 2003-2010 jyldary «Egemen Qazaqstan» respýblıkalyq gazeti» ashyq aktsıonerlik qoǵamynyń prezıdenti, vıtse-prezıdenti qyzmetin atqarǵan. Qazaq KSR Joǵarǵy Keńesiniń Qurmet gramotasymen marapattalǵan.
