Egemendigin ala almaı júrgen elder az emes
ASTANA. 16 jeltoqsan. QazAqparat - Etnograftardyń paıymdaýynsha, álemde 3,5 myńnan asa ult bar eken. Biraq Birikken Ulttar Uıymynyń qatarynda búginde 193 memleket qana bar.
Árıne, BUU quramyna tek Táýelsizdigi tanylǵan memleketter ǵana múshe bola alatyny belgili. Endi álemde táýelsizdigi tanylmaǵan qansha memleket baryn osydan-aq baǵamdaı berińiz. Tipti 50 mıllıonnan asa halqy bar kúrdter de, 20 mıllıonnan asa uıǵyr da áli kúnge deıin derbes el bola alǵan joq. Shotlandııalyqtar da Ulybrıtanııadan táýelsizdigin alǵysy keledi. Olar táýelsizdikke qatysty referendýmdy 2014 jyly ótkizýdi josparlap otyr. Venetsııa halqynyń da Italııadan bólingisi bar. Bavarııa Germanııadan táýelsizdik alǵysy keletinin ashyq jetkizip júr. Kornýoll halqy, Djersı araly Ulybrıtanııadan derbestikti ańsasa, Palestına halqy Izraılden bólinip, egemendi el bolǵysy keledi. Sanamalaı bersek, álemde táýelsizdigin ala almaı júrgen, azattyqty ańsap, derbestikke qol jetkize almaı júrgen elder óte kóp, dep jazady «Alash aınasy» gazeti.
