«Egemen Qazaqstan» sýretshisi halyqaralyq sharada top jardy
NUR-SULTAN. QazAqparat - Kýbanyń San-Antonıo-de-los-Banos qalasynda ótken HHІ halyqaralyq grafıkalyq ıýmor bıennalesinde «Egemen Qazaqstan» gazetiniń sýretshisi Aıdarbek Ǵazızovtyń týyndysy birinshi oryn aldy. Bul týraly «Egemen Qazaqstan» basylymy habarlady.
«San-Antonıo-de-los-Banos qalasy ıÝmor mýzeıi, Kýba jýrnalıster odaǵy jáne ıÝmorıster men grafıkalyq tarıh klýby birlese uıymdastyrǵan sharaǵa áý basta 55 memleketten 500 avtordyń 1400 shyǵarmasy kelipti. Al, konkýrstyń sońǵy aınalymyna 43 memlekettiń 209 sýretshisi joldaǵan 299 shyǵarma qatystyrylǵan. «Jeke karıkatýra», «Fotografııa», «Saıası satıra» jáne «Jalpy ıýmor» dep atalatyn birneshe atalym boıynsha uıymdastyrylǵan konkýrs barysynda bas júldeni kýbalyq sýretshi Lýıs Reınır Enrıke Torres ıelengen. Sonymen qatar, onyń eńbegi «Jeke karıkatýra» atalymynda birinshi oryn alsa kerek. Al, áriptesimiz Aıdarbek Ǵazızovtyń eńbegi «Jalpy ıýmor» atalymynda birinshi oryn alypty»,-dep jazady basylym.
Konkýrstyń qazylar alqasy quramyna Reseıden Vladımır Soldatov, AQSh-tan Lıza Donnelı, Salvadordan Karlos Alfredo Rýız Moısa, Belgııadan Sesıl Bertran, Japonııadan Koseı Ono, Kýbadan Zenaıda Manes Rodrıges jáne Alfredo Martırena Ernandes qatarly sýretshiler engen.
Bul konkýrs-kórme 1979 jyldan beri uıymdastyrylyp kele jatyr. Ári satıra janryndaǵy iri bıennalelerdiń biri.
