«Egemen Qazaqstan»-ǵa 100 jyl: Almaty oblysynda baıqaý jeńimpazdary anyqtaldy
TALDYQORǴAN. QazAqparat - «EgemenQazaqstan» gazetiniń 100 jyldyǵyn atap ótýdi aımaqtar arasynda alǵashqy bolyp Jetisý óńiri bastady. Oblystyq Tilderdi damytý basqarmasy uıymdastyrǵan «Til tarıhy: júz jyldyq jylnama» atty pýblıtsıstıkalyq shyǵarmalar baıqaýynyń qorytyndysy shyǵarylyp, jeńimpazdar marapattaldy, dep habarlaıdy QazAqparat tilshisi.
Bir aı buryn jarııalanǵan baıqaýǵa jetisýlyq jýrnalıster, til men rýh janashyrlary asa belsendilikpen qatysyp, «Egemen Qazaqstan» gazetiniń ult tiliniń damýyna qosqan úlesi men qazaq rýhanııatyndaǵy ornyn saralaǵan shyǵarmalaryn usyndy. Qazylar alqasynyń talqysyna túsken eńbekterdiń arasynan 5 avtordyń jumysy iriktelip, júldege ilikti. Nátıjesinde, 1-oryn oblystyq «Jetisu» gazetiniń tilshisi Bolat Májıtke buıyryp, júldeli 2-oryndy jas jýrnalıst Dastan Qastaı qanjyǵasyna baılady. Al 3-orynǵa «Jetisu» gazetiniń tilshisi Qajet Ańdas laıyq bolyp, eki yntalandyrý syılyǵy «Qaratal» aýdandyq gazetiniń bas redaktory Ashat Ómirbaev pen «Jetisu» gazetiniń tilshisi Muhtar Kúmisbekke berildi.
Taldyqorǵandaǵy Til saraıynda ótken saltanatty jıyndy ashqan oblystyq Tilderdi damytý basqarmasynyń basshysy Aıdar Bashbaev qazaq tiliniń taǵdyrly tarıhyndaǵy baspasózdiń alatyn ornyn aıshyqtap, «Egemen Qazaqstan» gazetiniń ult damýy men til mádenıetin qalyptastyrýdaǵy ǵasyrlyq shejiresine toqtaldy. Jıynda basylym ardageri, kezinde gazette menshikti tilshi bolǵan aǵa býyn jýrnalıst Álı Ysqabaı, belgili ysqaqshy Turlyhan Kárim, jetisýlyq maıtalman qalamgerler Núsipbaı Ábdirahym, Bolat Abaǵan, aqyn Saǵynysh Namazshamova da sóz alyp, bas basylymdy mereıli jasymen quttyqtady.
Igi shara barysynda basylymnyń Almaty oblysyndaǵy menshikti tilshisi Qalmahanbet Muqametqalı baıqaýdy uıymdastyrǵan oblys ákimdigine, Tilderdi damytý basqarmasyna jáne qalyń oqyrmanǵa «Egemen Qazaqstan» gazetiniń basqarma tóraǵasy Darhan Qydyráliniń atynan alǵysyn bildirdi.
