«Egemen Qazaqstan» balalardy ertegiler eline jeteleıtin jobany qolǵa aldy
NUR-SULTAN. QazAqparat – «Egemen Qazaqstan» gazetiniń YouTube arnasynda «Qýyrshaq» teatrynyń ártisi, Mádenıet salasynyń úzdigi Saltanat Maǵzym úıde otyrǵan balalarǵa ertegi oqyp berip, jas kórermenniń kóńilin aýlap júr.
Eki apta buryn bastalǵan «Egemennen – ertegi» jobasy kóp búldirshinniń asyǵa kúter baǵdarlamasyna aınaldy, dep habarlaıdy QazAqparat tilshisi.
«Ertegi balany meıirimge úndeıdi. Tapqyrlyqqa úıretedi. Elimizdiń bas gazeti «Egemen Qazaqstan» men «Qýyrshaq» teatrynyń birlesken jobasy urpaq úshin basty baılyq. Dál qazirgi qıyn sátti birlese jeńip shyǵatynymyz sózsiz. Mundaı jobalardy qoldaýymyz kerek, az da bolsa úlesimdi qosyp otyrǵanyma qýanyshtymyn», - deıdi Nur-Sultan qalasy ákimdigi «Qýyrshaq» teatrynyń ártisi Saltanat Maǵzym.
Ideıa avtory – «Egemen Qazaqstan» AQ Basqarma tóraǵasy Darhan Qydyráli. Qazaq radıosyndaǵy «Erden atanyń ertegileri», «Zámzágúl ájeniń ertegileri», «Keshki ertegiler» degen atpen úzilissiz berilip turatyn shaǵyn joba kórermenniń nazaryn ózine aýdaryp otyr. Jaqynda Prezıdent Ákimshiligi Basshysynyń birinshi orynbasary Máýlen Áshimbaev Facebook paraqshasynda jobany erekshe atap ótken.
«Qazir úıden shyqpaı otyrýdyń ózi synaqqa aınaldy. Osyndaı kezde oqshaýlanǵan halyqtyń teledıdar men ınternetke kóbirek ýaqyt bóletini jasyryn emes. Sondyqtan mándi, maǵynaly dúnıelerdi arttyrýdyń mańyzy zor. Osy rette sondaı ıgi isterdiń biri de biregeıi retinde «Egemennen ertegi» jobasyn atap ótkim keledi. Kún saıyn «Egemen Qazaqstan» gazetiniń YouTube arnasynan beriletin ertegiler mynadaı jaımashýaq kúnderde dalaǵa shyǵýǵa asyǵatyn oıyn balasy úshin taptyrmas ermek bolary sózsiz», - dep jazdy M.Áshimbaev.
Joba úılestirýshisi Aıa Ómirtaı bastama aldaǵy ýaqytta da jalǵasyn tabatynyn, tipti ony anımatsııalyq turǵyda damytý jospary baryn aıtady. Sondaı-aq balalar arasynda baıqaý uıymdastyrý jospary týraly bólisti.
«Yqylym zamannan kúni búginge deıin jalǵasyp kele jatqan qazaq halyq ertegileriniń dál qazir qajettiligi tipti kúsheıip, mán-maǵynasy artyp otyr. Úıde oqshaýlaný kezinde balalarǵa arnap erikti túrde atalǵan jobany bastadyq. Alda jobany jan-jaqty damytýdy oılastyryp otyrmyz. Bizdiń oıymyzsha, qalaı bolǵanda da balalarǵa arnalǵan qazaq tilindegi kontentti damytý kerek. Múldem joqqa shyǵara almaımyz, áıtse de jekelegen erikti toptar qazaq balalar ádebıetine qatysty túrli jobalardy usynyp jatqany qýantady. Osy qatardaǵy bas basylymnyń «Balalarǵa bazarlyǵy» da qysqa ýaqytta turaqty jas tyńdarmandaryn taýyp úlgerdi», - deıdi Aıa Ómirtaı.
