«Egemen Qazaqstannyń» 90 jyldyq mereıtoıynyń qurmetine K.Baıseıitova atyndaǵy opera jáne balet teatrynda saltanatty kontsert ótedi
ASTANA. Jeltoqsannyń 15-i. QazAqparat - «Egemen Qazaqstannyń» 90 jyldyq mereıtoıyna oraı K.Baıseıitova atyndaǵy opera jáne balet teatrynda saltanatty kontsert ótkizý josparlanýda.
Bul týraly «Arna Medıa» Ulttyq aqparattyq holdınginiń baspasóz qyzmetinen habarlady.
Aǵymdaǵy jyly respýblıkalyq basylymnyń ujymy jańa ǵımaratqa kóshti. Mereıtoı aıasynda sondaı-aq Elbasynyń qatysýymen gazettiń jańa ǵımaratynyń saltanatty ashylýy josparlanýda.
Táýelsizdik kúni «Egemen Qazaqstan» respýblıkalyq gazeti týraly «El gazeti -«Egemen» derekti fılmi ekranǵa shyǵady.
«Egemen Qazaqstan» respýblıkalyq gazeti - elimizdegi qazaq tildi eń úlken basylym. Ol kún saıyn 150 myń danamen taratylady. 2008 jyldyń shilde aıynan bastap «Egemen Qazaqstan» respýblıkalyq gazeti» aktsıonerlik qoǵamy «Arna Medıa» Ulttyq aqparattyq holdınginiń quramyna kirdi.
