«Egemen Qazaqstan» ujymy jýrnalıster arasyndaǵy týrnırde jeńimpaz atandy
ASTANA. QazAqparat - Búgin Astanada QR Mádenıet jáne sport mınıstrliginiń uıymdastyrýymen ótken BAQ ókilderi arasyndaǵy shaǵyn fýtboldan Seıdahmet Berdiqulovty eske alýǵa arnalǵan týrnırde «Egemen Qazaqstan» gazeti bas júldeni jeńip aldy, dep habarlaıdy QazAqparat tilshisi.
Osymen 20-shy ret ótkizilip otyrǵan sport dodasyna bıyl 22 komanda qatysty. Toptyq kezeńde «Egemen Qazaqstan» gazetiniń tilshileri «Prosport» komandasyna 1:2 esebimen ese jibergenimen, «Qyzyljar» komandasyn 4:2, «Kazsport» quramasyn 7:0 jeńdi.
Al 1/4 fınalda OQO-2 komandasyn 2:1 esebimen utsa, jartylaı fınalda «Habar» telearnasyn da dál osyndaı kórsetkishpen qapy qaldyrdy. Fınalda olar Ońtústik Qazaqstan oblysynyń BAQ ókilderinen quralǵan OQO-1 komandasymen kezdesip, olardy da 2:1 esebimen utyp, týrnırdiń jeńimpazy atandy.
Úzdik ekinshi oryndy OQO-1 komandasy jeńip alsa, úzdik úshtikti «Habar» arnasynyń aıaqdop sheberleri qanjyǵasyna baılady. Jeńimpazdar men júldegerler arnaıy kýboktarmen marapattaldy.
