«Egemen Qazaqstan» gazetiniń jýrnalısterge arnalǵan jataqhanasy paıdalanýǵa berildi
ASTANA. QazAqparat - Búgin «Egemen Qazaqstan» AQ prezıdenti Saýytbek Abdrahmanov pen Investıtsııalar jáne damý vıtse-mınıstri Sáken Sársenov gazettiń jýrnalısteri men qyzmetkerlerine jataqhanadaǵy bólmelerin kiltin tabys etti.
5 qabatty, 15 sektsııadan turatyn, qajetti jabdyqtar men jıhazdary túgel, jalpy aýmaǵy 1 myń sharshy metrden asatyn jataqhana ǵımaraty bir jylda salynǵan eken.
«Іshteı kúnderdiń bir kúninde, jyldardyń bir jylynda jýrnalıster 100 paıyz baspanaly bolatyn kúnge jetsek eken dep ishteı armandaýshy edim. Endi, mine, «Egemen Qazaqstan» gazetinde basynda baspanasy joq jýrnalıst qalmady. Biz tehnıkalyq qyzmetkerlerdi de jataqhanamen qamtýǵa tyrysamyz. «Egemen Qazaqstan» gazetiniń 90 jyldyǵynda 9 sektsııaly jataqhana paıdalanýǵa berilgen edi»,-deıdi qyzmetkerlerin qonys toıymen quttyqtaǵan S.Abdrahmanov.
Gazettiń ekonomıka bóliminde jumys isteıtin jýrnalıst Nurbaı Elmuratov buǵan deıin qalaǵa 40-45 shaqyrym jerden qatynap, jumys istegen eken.
«Tórt balam bar. Astanalyq bolý ońaı emes, endi tolyq elordalyq bolyp jatyrmyz. Osyǵan deıin 40-45 shaqyrym jerden kelip jumys isteıtinmin. Endi osy jataqhanada ósip-ónip kóbeıemiz. Basshylarǵa kóp rahmet. «Egemen Qazaqstan» gazetiniń statýsyn bilesizder, keı kezde tańǵy saǵat 4-5-ke deıin kózdiń maıyn taýysyp, jumys isteıdi. Biraq, sonyń syrtynda bizdiń de áleýmettik jaǵdaıymyzdy jasap otyr. Bizdiń alańdamaı shyǵarmashylyqpen aınalysý úshin osyndaı jaǵdaı týdyryp otyr. Mereke qarsańynda qonys toıyn toılaımyz»,- deıdi N.Elmuratov.
Jalpy, búgin ashylǵan jataqhanaǵa 15 adam januıasymen jáne 3 qyzmetker ornalaspaq.
