«Egemen Qazaqstan» gazetiniń tilshisi Atyraýdaǵy aıtystyń bas júldesin ıelendi

ATYRAÝ. QazAqparat – Atyraýda Abaıdyń 175 jyldyǵyna arnalǵan «Qaıran elim qazaǵym..» atty respýblıkalyq aqyndar aıtysynyń bas júldesine «Egemen Qazaqstan» gazetiniń tilshisi, aıtysker aqyn Raýan Qaıdar ıe boldy, dep habarlaıdy QazAqparat.

Respýblıkalyq aqyndar aıtysyna elimizdiń ár óńirinen 24 aqyn qatysty. Aıtysty Qazaqstannyń Eńbek Eri Asanáli Áshimov tóraǵalyq etken qazylar alqasy saralady.

Óreli sózben keste túıgen aqyndar Abaıdyń danalyǵy men ulaǵatynyń tárbıelik mánine toqtaldy. Qazirgi qoǵamnyń damý úderisin, qordalanǵan máselelerdi ortaǵa saldy. Jeńge men qaıny arasyndaǵy ádemi ázildiń aıtysyn jasady.

Qazylar alqasy aqyndardyń kórkem oıyn, sóz saptaýyn saralap, bas júldeni 24 aıtysker aqynnyń arasynan oza shapqan «Egemen Qazaqstan» gazetiniń tilshisi Raýan Qaıdarǵa berdi. Bas júldeni oblys ákimi Mahambet Dosmuhambetov tapsyrdy.

Birinshi oryndy Erkebulan Qaınazar, ekinshi oryndy Rústem Qaıyrtaıuly men Shalqarbaı Іzbasarov ıelendi. Úshinshi júldemen Ásem Erejeqyzy men Altyngúl Qasymbekova, Nurmat Mansurov marapattaldy.

Al, Serik Qoıshyǵulov pen Jánibek Sadyrov, Syrymbek Sársenbaev arnaıy júldege ıe boldy.

Eske sala ketelik, budan buryn Atyraýda Abaıdyń 175 jyldyǵyna oraı respýblıkalyq aıtys ótip jatqanyn habarlaǵan edik.