«Egemen Qazaqstan» gazetiniń prezıdenti taǵaıyndaldy (FOTO)

ASTANA. QazAqparat - Búgin «Egemen Qazaqstan» respýblıkalyq gazeti» aktsıonerlik qoǵamyna jańa basshynyń taǵaıyndalýyna baılanysty jıyn bolyp ótti. Onda Investıtsııalar jáne damý vıtse-mınıstri Sáken Sársenov sóz alyp, atalǵan aktsıonerlik qoǵam jarǵysynyń 47-tarmaǵy 15-tarmaqshasyna sáıkes shyǵarylǵan buıryqty oqyp berdi.

Buıryqqa saı Erkin Saǵyndyquly Qydyr 2016 jyldyń 11 sáýirinen bastap «Egemen Qazaqstan» respýblıkalyq gazeti» aktsıonerlik qoǵamynyń basqarma tóraǵasy bolyp saılandy.

Vıtse-mınıstr óz sózinde Erkin Qydyrǵa jańa qyzmette sáttilik tilep, jyly lebizin bildirdi. Ol sondaı-aq, osy ýaqytqa deıin redaktsııaǵa basshylyq jasap kelgen, búginde Parlament Májilisiniń depýtaty bolyp saılanǵan Saýytbek Abdrahmanovqa gazetti uzaq jyldar tabysty basqarǵany úshin rahmet aıtty.

Óz kezeginde Saýytbek Abdrahmanov uzaq jyldar qyzmettes bolǵan ujym múshelerine alǵys sezimin bildirdi.

Erkin Qydyr 1962 jyly 1 tamyzda týǵan. 1984 jyly Ál-Farabı atyndaǵy Qazaq Ulttyq ýnıversıtetin  jýrnalıstıka, 2007 jyly Qazaq jol qatynastary ýnıversıtetin ekonomıka jáne basqarý mamandyǵy boıynsha bitirdi. Eńbek jolyn 1984 jyly Shymkent qalasyndaǵy qorǵasyn zaýytynda slesar bolyp bastady. 1985-1990 jyldary sol kezdegi Shymkent oblystyq «Ońtústik Qazaqstan» gazetinde tilshi bolyp qyzmet atqardy. 1990-1996 jyldary «Sotsıalıstik Qazaqstan» gazetiniń Ońtústik Qazaqstan oblysyndaǵy menshikti tilshisi boldy. 1996-2006 jyldary «Egemen Qazaqstan» respýblıkalyq gazeti bas redaktorynyń birinshi orynbasary, 1997-1998 jyldary Qazaqstan Respýblıkasynyń Prezıdenti janyndaǵy Joǵary tártiptik keńestiń múshesi, 2007-2008 jyldary «Egemen Qazaqstan» respýblıkalyq gazeti» aktsıonerlik qoǵamynyń dırektory jáne 2008 jyldan 2009 jyldyń 7 mamyryna deıin «Egemen Qazaqstan» respýblıkalyq gazeti» aktsıonerlik qoǵamynyń vıtse-prezıdenti bolyp qyzmet etti. 2009 jyldyń 7 mamyrynan búginge deıin «Egemen Qazaqstan» respýblıkalyq gazeti» aktsıonerlik qoǵamy basqarma tóraǵasynyń orynbasary (vıtse-prezıdent) qyzmetin abyroımen atqaryp keldi. Bul eńbekteri laıyqty baǵalanyp, 1999 jyly jýrnalıstıka salasy boıynsha Prezıdent syılyǵynyń laýreaty, 2010 jyly «Qazaqstannyń eńbek sińirgen qaıratkeri» ataǵyn aldy.

Erkin Qydyrdyń qalamynan týǵan shyǵarmalar «Usaqtama, Úkimet» (2001 j.), «Otyrar» (2009 j.) kitaptary bolyp jaryqqa shyqty.

Otbasyly. Úsh balasy bar.