«Egemen Qazaqstan» gazeti jańa dızaınmen shyǵady
ASTANA. QazAqparat - Erteń, 1 qyrkúıekten bastap «Egemen Qazaqstan» respýblıkalyq gazeti jańa dızaınmen jaryq kóredi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli málim etti.
«1 ǵasyrlyq tarıhy bar, arǵysy Alash arystarynan, berisi egemendiktiń eleń-alańynan beri elimizdiń jylnamasyn jazyp júrgen «Egemen Qazaqstan» gazeti bıylǵy Táýelsizdiktiń shırek ǵasyrlyq toıyna tartýmen kelip otyr. Aqparat mınıstri Dáýren Áskerbekulynyń uıǵarymy boıynsha biz bir aıdyń kóleminde álemdik basylymdardy salystyryp, saraptap gazetimizdiń jańa maketi men logotıpin jasadyq», - dedi ol.
Sonymen qatar ol gazettiń damý strategııasynyń da jasalǵanyn atap ótti. Al jańa logotıpten basylym alǵash ret «Ushqyn» degen ataýmen shyqqannan bergi júrip ótken jolyn kórýge bolady. Túsi elimizdiń týy sııaqty aqshyl kók.
«Basty jańalyǵymyz gazet ataýyn jańa shrıfpen jazylady. Aıtalyq, «Egemen Qazaqstan» degen jazýdyń boıaýy, stıli, jazylýy ózgerdi. Boıaýyn tańdaǵan kezde týymyzdyń ashyq kókshil túsin tańdap otyrmyz. Negizgi bólimderde de ózgerister bar», - dep atap ótti D.Qydyráli.
