«Egemen Qazaqstan» gazeti Ábish Kekilbaevtyń «Dáýir daýysy» atty kitabynyń tusaýyn kesti
«Bul - «Egemen Qazaqstan» gazeti kitaphanasy» atty arnaıy serııamen jaryqqa shyqqan tuńǵysh kitap. Bul - qabyrǵaly qaıratker Kekilbaev kerýeniniń basy. Serııanyń ekinshi, úshinshi tomdary Táýelsizdik týraly tolǵaýlardy quraıdy. Tórtinshi tom Sherhan Murtazaǵa arnalady. Sosyn Egemenniń júz jyldyq tarıhynda osy qara shańyraqta qyzmet etken tulǵalardyń eńbekteri, shyǵarmalary jaryq kórmek. Bir ereksheligi budan keıingi kitaptardyń barlyǵy da dál osyndaı serııamen, dál osyndaı dızaınmen, stılmen shyǵyp turatyn bolady. Qazaq eli barda Ábish Kekilbaevtyń shyǵarmalary, asyl muralary toqtamaı, Máńgilik Elge sapar shegedi degen oıdamyz. Kitapqa Ábish aǵamyzdyń 400-den asa maqalalary biriktirilgen», - dedi «Egemen Qazaqstan» respýblıkalyq gazeti» aktsıonerlik qoǵamynyń Basqarma tóraǵasy Darhan Qydyráli.
Onyń aıtýynsha, kitapta Ábish Kekilbaevtyń 1990 jyldan bastap jarııalanǵan maqalalary berilgen.
«Dáýir daýysy» atty osy tuńǵysh kitap «Egemen Qazaqstan» gazetiniń Ábishtanýǵa qosqan úlesi. Endigi maqsat taý tulǵany jastar arasynda ǵana emes, álemdik deńgeıde nasıhattaýǵa úles qosý», - deıdi Darhan Qydyráli.
Sonymen qatar, búgin «Egemen Qazaqstannyń» jańa kitaphanasynda qazaqtyń klassık jazýshysy, basylymnyń burynǵy bas redaktory Ábish Kekilbaevtyń murasyna arnalǵan múıis ashyldy. Sharaǵa Kenjeǵalı Saǵadıev, Qoıshyǵara Salǵarın, Qajyǵalı Muhambetqalıev, Tólen Ábdikov, Saýytbek Abdrahmanov, Nesipbek Aıtuly, Zeınolla Alshynbaev sııaqty zııalylar jáne qalamgerdiń zaıyby Klara Jumabaeva qatysty. Múıiske qalamgerdiń kórkem shyǵarmalary, ózge tilderge aýdarylǵan týyndylary, pýblıtsıstıkalyq eńbekteri qoıylǵan. Sonymen qatar munda jazýshynyń jeke zattary da bar.
«Egemen Qazaqstan» redaktsııasyndaǵy kitaphanada aldaǵy ýaqytta Sherhan Murtazaǵa, Aqseleý Seıdimbekke de arnalǵan arnaıy buryshtar ashý josparlanǵan. 
