Egemen Qazaqstan gazeti 100 jyldyq tarıhyn tsıfrly júıege kóshiredi
ASTANA. QazAqparat - Búgin Astanadaǵy Ulttyq kitaphanada «Egemen Qazaqstan» gazeti birqatar jobalardyń tanystyrý rásimin ótkizdi. Ulystyń uly kúni Naýryz merekesi qarsańynda tanystyrylǵan aqparattyq-ımıdjdik jobalar negizinen «Tsıfrly Qazaqstan» baǵdarlamasy aıasynda júzege aspaq, dep habarlaıdy QazAqparat.
Tsıfrly Qazaqstan baǵdarlamasy aıasynda qolǵa alynǵan sharalardyń alǵashqysy - «Egemen Qazaqstan» gazetiniń arhıvindegi barlyq nómirin túgendeý jáne túgeldeı tsıfrly nusqaǵa kóshirý. Bas basylymnyń 100 jyldyq mereıtoıyna oraılastyryp qolǵa alynǵan jobanyń jalpy jurtshylyq úshin mańyzy zor.
«1919 jyldyń 17 jeltoqsanynda «Ushqyn» degen ataýmen shyqqan kezinen bastap, sodan keıingi jyldardaǵy «Eńbek týy», «Eńbekshil qazaq», «Eńbekshi qazaq», «Sotsıaldy Qazaqstan», «Sotsıalıstik Qazaqstan», «Egemendi Qazaqstan», «Egemen Qazaqstanǵa» deıingi sandarynyń tolyq tsıfrly muraǵaty jınaqtalatyn bolady. Jalpy el gazetinde Qazaqstannyń 100 jyldyq tarıhyn da aıqyn kórýge bolady. Óıtkeni, munda shejireli jyldardyń barlyq belesteri kórinis tapqan, bas basylym zar zamandaǵy jaǵdaılardan da aınalyp óte almaǵan. Asharshylyq, zulmat, soǵys jyldary, tyń ıgerý máseleleriniń barlyǵy sol kezeńniń tilimen bizge jetip otyr», - deıdi «Egemen Qazaqstan» gazeti AQ Prezıdenti Darhan Qydyráli.
Onyń aıtýyna qaraǵanda, gazet arhıvterin tsıfrly nusqaǵa aýystyrý kóptegen múmkindikterge jol ashpaq. Máselen, osy arqyly oqyrman da, izdenýshi ǵalymdar da gazettiń ótken jyldardaǵy kúnin terý arqyly kez kelgen sanynan ondaǵy materıaldarmen tanysa alady.
Budan bólek, «Egemen Qazaqstan» gazetiniń júrip ótken joly 10 tomdyq kitap bolyp basylyp shyqpaq. Bul el gazetiniń 100 jyldyq mereıtoıy qarsańynda aıaqtalady dep josparlanǵan. On tomdyq jobasyna qatysýshylardyń biri Namazaly Omashuly zertteý jumystaryn jasaı júrip, «Egemen Qazaqstannyń» arhıvin úsh ret qarap shyqqanyn aıtty.
«Ol nómirler tórt jerde saqtaýly. Biraz betteri joǵalǵan, qıylǵan. Al endi sol arhıv elektrondy formatqa kóshirilse nemese ol arhıv on tomdyq kitap bolyp shyqsa, zertteýshiler úshin baǵa jetpes syılyq bolǵaly tur. Óıtkeni, «Egemen Qazaqstannyń» arhıvi óte baı. Onyń bir bóligi tóte jazý nusqasynda, olardy kırıllıtsaǵa kóshirý qajet», dedi Namazaly Omashuly. Jınaqtyń alǵashqy alty tomy kelesi jyly shyǵady, al basylymnyń 100 jyldyǵyna qaraı on tomdyq tolyǵymen oqyrman nazaryna usynylmaq.
Gazettiń qolǵa alǵan kelesi bir jobasy «Tsıfrly Qazaqstan: Máńgilik El muralary» dep atalady. Ýıkı-Bilim qorymen birlesip atqarylatyn joba arqyly elimizdiń ǵalamtordaǵy aqparattyq-ımıdjdik betbeınesiniń tanylymyn arttyrýńa baǵyttalady. Bul rette «Egemenniń» asa baı fotomuraǵatynda saqtalǵan, el tarıhynan, táýelsizdiktiń syndarly sátteri men jarqyn jetistikterinen habar beretin Qazaqstannyń qalalary men kórikti mekenderi týraly sırek fotosýretter usynylady.
«Jobanyń artyqshylyǵy tsıfrly qalypqa kóshirilgen fotosýretter Wikimedia Commons repozıtarıı júıesine júkteledi. Árbir fotoǵa qazaq, orys, aǵylshyn tilderinde túsindirmeler beriledi. Álemniń qaı qıyrynan bolmasyn, Qazaqstan týraly aqparat alǵysy kelgender, elimizben tanysqysy keletinder osyndaı qundy fotolarǵa qol jetkize alady», - deıdi basylym jetekshisi Darhan Qydyráli.
Sondaı-aq, Egemen Qazaqstan gazeti jańa portalynyń jobasyn da tanystyrdy. Erekshe dızaınmen jasalǵan egemen.kz portaly 22 naýryz kúni iske qosylady.
Jıynǵa qatysqan aǵa býyn ókilderi, zııaly qaýym zamanaýı jobalardyń mańyzdylyǵyn aıtyp, Naýryz qarsańynda qolǵa alynǵan isterge ıgilik tiledi.
