Egemen, Qazaqstan: erekshe esim ıesi bolý aýyrtpalyq pa, abyroı ma
ASTANA. KAZINFORM — Qazaqstan táýelsizdik alǵan kezeń eldiń saıası ǵana emes, rýhanı ómirin de ózgertti. Sol jyldary dúnıege kelgen sábılerge ata-analary el taǵdyrymen sabaqtas, máni tereń esimder berdi. Búginde sol urpaq — egemen eldiń tiregi.
Elimizde Qazaqstan esimdi 28 azamat bar
Ulttyq statıstıka bıýrosynyń dereginshe, búginde elimizde Qazaqstan esimi 28 azamatqa tıesili. Olardyń eń úlkeni 92 jasta, eń kishisi — 25-te.
Atap aıtqanda:
- Qaraǵandy oblysynda — 7;
- Aqmola oblysynda — 6;
- Qostanaı oblysynda — 3;
- Astanada — 3;
- Almaty men Mańǵystaý oblystarynda jáne Shymkent qalasynda — 2;
- Aqtóbe, Batys Qazaqstan jáne Pavlodar oblystarynda — 1 adam bar.
— Bul esim Qaraǵandy, Aqmola jáne Qostanaı oblystarynda jıi kezdesedi. 28 adamnyń arasynda bir ǵana áıel bar. Sondaı-aq elimizde Táýelsizdik jáne Egemen esimdi azamattar da tirkelgen, — deıdi Ulttyq statıstıka bıýrosynyń sarapshysy Juldyz Tursynova.
Jaqyndary «Qazaq» dep ataıdy
Erekshe esim ıeleriniń biri — qaraǵandylyq Qazaqstan Jarqyn. Ol Qaraǵandy jáne Ulytaý oblystarynyń Qylmystyq atqarý júıesi departamentiniń № 29 mekemesinde jedel ýákil qyzmetin atqarady.
Atasy ony egemendiktiń qýanyshyna balap Qazaqstan ataǵan.
— Esimimniń salmaǵyn sezinemin. Alǵash tanysqan adamdar tańǵalyp, qaıtalap suraıdy. Qyzmetim de, esimim de elmen, patrıotızmmen baılanysty. Bul — men úshin úlken jaýapkershilik, — deıdi ol.
Áriptesteri keıipkerimizdi «Qazaq» dep ataıdy. Bul onyń eljandy bolmysyna berilgen baǵa ispetti.
— Jumysta, otbasynda ony «Qazaq» dep ataıdy. Minezi sabyrly, eńbekte tııanaqty. Qoǵamdyq sharalarǵa belsendi qatysady, sportqa jaqyn. Naǵyz otanshyl azamat, — deıdi mekeme bastyǵynyń orynbasary Janseıit Ábilqasymov.
Qazaqstan — otbasynda qamqor áke, jumysynda jaýapty maman. Onyń ómirlik ustanymy da qarapaıym. Ol — adal eńbek pen temirdeı tártip.
«Esimimdi eshqashan aýystyrmaımyn»
Al Pavlodar oblysynda turatyn Egemen Baqyt — Mońǵolııadan qonys aýdarǵan qandas. Qazir jeke kásippen aınalysyp, «Saryarqa murager» qaıyrymdylyq qorynyń jumysyna atsalysyp júr.
— Mońǵolııanyń Baıan-Ólgıı aımaǵynda týdym. Ákemniń aǵasy radıodan Qazaqstannyń táýelsizdik alǵanyn estip, qýanysh ústinde esimimdi Egemen qoıǵan. Sol sát bizdiń áýlet úshin erekshe este qaldy. 1997 jyly tolyqtaı Pavlodarǵa kóship keldik, — deıdi ol.
Egemen esimi baýyrlas túrki halyqtarynda da keń taraǵan. Sondyqtan onyń aty shetelde júrgende jıi nazar aýdartady.
— Stambulda oqyp júrgende metro ishinde «Egemen!» dep shaqyrǵan daýysty estip, jalt qaradym. Sóıtsem, túrik azamaty óz balasyn shaqyryp jatyr eken. Osyndaı qyzyqty sátter jıi kezdesedi, — deıdi ol.
Egemen óz esimin erekshe qurmetteıdi jáne ony eshqashan ózgertýdi oılamaǵan.
— Bul — meniń elge degen qurmetimniń kórinisi. Esimimde meniń taǵdyrym da, táýelsizdigimizdiń rýhy da bar, — deıdi ol.
Osylaısha, erekshe esim ıeleri búginde el damýyna óz úlesin qosyp júr. Olardyń esimi de, ómir joly da táýelsiz elimizdiń tarıhymen sabaqtasady.