Egde jastaǵy qazaqstandyqtardyń 40 paıyzy ǵana memqyzmetterdi óz betimen paıdalana alady

NUR-SULTAN. QazAqparat – Egde jastaǵy qazaqstandyqtardyń 40 paıyzy ǵana memlekettik qyzmetterdi óz betimen paıdalana alady. Bul týraly QR Tsıfrlyq damý, ınnovatsııalar jáne ınfraqurylymdyq damý mınıstrligi aqparattyq tehnologııalar salasyn damytý departamenti dırektorynyń orynbasary Dáýlet Dýshabaev aıtty, dep habarlaıdy QazAqparat tilshisi.

«2018, 2019, 2020 jyldary qazaqstandyqtar 5 baǵyt boıynsha tsıfrlyq saýattylyq talaptaryn oqydy. 2019 jyly elektrondy memlekettik qyzmet túrlerin tek 2,2 mln qazaqstandyq paıdalana alǵan. Al 2020 jyly olardyń sany 7 mıllıonǵa deıin jetse, 2021 jyly 13 mln adam elektrondy qyzmetterdi alǵan. Bul jaqsy kórsetkish. eGov-qa tirkelgen qoldanýshylar týraly aıtsaq, 2019 jyly 516 myń adam tirkelse, 2021 jyly – 6.6 mln adam tirkeýden ótken», - dedi vedomstvo ókili.

Ol aıtqan tsıfrlyq saýattylyq kýrstarynan 6-74 jas aralyǵyndaǵy adamdar ótken.

«2020 jyly biz adamdardy tsıfrlyq saýatylyqqa oqytý qanshalyqty tıimdi degen suraqqa bas qatyrdyq. Sol suraqqa jaýap tabý úshin adamdardy úsh topqa bóldik. Tsıfrlyq saýattylyqtyń deńgeıin kóteretin basqa joldardy tapqymyz keldi. Birinshi top túrli sanatqa jatatyn adamdardan saýalnama alyp, onshaqty tereń suhbattar júrgizdi, halyqaralyq tájirıbeni zerttedi. Saýalnamaǵa 25-75 jas aralyǵyndaǵy 3 myńdaı adam qatysty. Qorytyndysy 65-70 jas aralyǵyndaǵy qazaqstandyqtardyń tek 40%-y ǵana memlekettik qyzmetterdi paıdalana alatynyn kórsetti. 65-75 aralyǵyndaǵy qazaqstandyqtar fakti men derekkóz senimdiligin teksere almaıtynyn moıyndaǵan. Al 35-40 jas arasyndaǵy qazaqstandyqtardyń 66%-y faktiler men derekkózderdiń senimdiligin teksere alatyndaryn aıtty» - dedi Dáýlet Dýshabaev.

Foto: campitur.com