Egde jastaǵy adamdar koronavırýstan qalaı qorǵanýy kerek - dáriger keńesi
ALMATY. QazAqparat - Qarttar koronavırýs ınfektsııasyn aýyr kóteredi jáne osynyń saldarynan bolatyn jaǵymsyz boljam bar. Egde adam bul aýrýdan qalaı qorǵanýy kerek. Bul týraly QazAqparat tilshisine №36 qalalyq emhananyń terapevt dárigeri Sabyrjan Jarymhan aıtyp berdi.
Dárigerdiń aıtýynsha, ǵalymdardyń zertteýlerine sáıkes, egde adamdar vırýs ınfektsııasyn aýyr kóteredi
«Dúnıejúzilik densaýlyq saqtaý uıymynyń klassıfıkatsııasy boıynsha egde jastaǵylar – 60 – 74 jas, kárilik – 75 – 90 jas, uzaq ómir súretinder – 90 jastan asqandar bolyp bólinedi.
Bul toptardyń jas jáne orta jastaǵy adamdarǵa qaraǵanda koronavırýstan asqyný men ólim qaýpi aıtarlyqtaı joǵary. 80 jastan asqan adamdarda ólim kórsetkishi 15%-ǵa jetedi, al 50 jasqa deıingi adamdarda 0,5%-dan az. Koronavırýspen aýyrǵannan keıin naýqastar trombozben, kognıtıvti fýnktsııanyń tómendeýimen jáne júrek-tamyr júıesi aýrýlarymen baılanysty asqynýlardy bastan keshiredi. Sonymen birge olarda 3 aıdan 8-9 aıǵa deıin aýyr belgiler bolýy múmkin», - dedi Sabyrjan Jarymhan.
Dáriger atap ótkendeı, COVID-19-dan bolatyn ólim-jitimniń dúnıejúzilik statıstıkasy osy aýrýdan qaıtys bolǵandardyń arasynda arterııalyq gıpertonııa, júrektiń ıshemııalyq aýrýy, qant dıabeti sekildi ilespeli aýrýlary bar egde jastaǵy adamdardyń jıi kezdesetini dáleldendi. «Qazirgi ýaqytta bizdiń koronavırýspen kúresýdegi negizgi quralymyz -vaktsına jáne aldyn alý sharalaryn saqtaý. Muny bári biledi. Egde adamdar basqa naýqastarǵa qaraǵanda vaktsınatsııany jaqsy kóteredi. Olardyń arasynda dene temperatýrasynyń kóterilýi, álsizdik sııaqty shaǵymdar óte az kezdesedi. Al eger ekpeden keıin de aýyryp qalsa, onda jeńil ótedi «, - deıdi ol.
Sonymen qatar, dáriger qart adamdar arasynda aýrýdyń aldyn alý úshin birqatar mańyzdy usynystar aıtty.
«Biz ata-anamyzdy, qart adamdardy kóbirek aqparattandyrýymyz kerek. Jáne negizgi profılaktıkalyq sharalardy saqtaýǵa kómektesýimiz qajet. Bul toptaǵy adamdar asa qajet bolmasa, kóshege shyǵýdan, qoǵamdyq oryndarǵa barýdan jáne qoǵamdyq kólikti paıdalanýdan bas tartqandary abzal. Maska taǵý jáne áleýmettik qashyqtyqty saqtaýdyń mańyzdylyǵyn umytpaǵan jón. Sonymen qatar, úı jaǵdaıynda jattyǵýlar jasap otyrǵan durys. Eger temperatýra, qurǵaq jótel, entigý sııaqty belgiler paıda bolsa birden úıge dáriger shaqyrtý kerek»,- deıdi spıker.
