Egde adamdar koronavırýstan qalaı qorǵanýy kerek - pýlmonolog keńesi
NUR-SULTAN. QazAqparat - COVID-19-dan bolatyn ólim-jitimniń dúnıejúzilik statıstıkasy osy aýrýdan qaıtys bolǵandardyń arasynda arterııalyq gıpertonııa, júrektiń ıshemııalyq aýrýy, qant dıabeti sekildi ilespeli aýrýlary bar egde jastaǵy adamdardyń jıi kezdesetinin dáleldedi. Bul týraly medıtsına ǵylymdarynyń doktory, professor Sáýle Qasenova aıtty, dep habarlaıdy QazAqparat tilshisi.
«Egde adamdar vırýs ınfektsııasyn aýyr kóteredi jáne osynyń saldarynan bolatyn jaǵymsyz boljam bar. Ókpeniń sozylmaly obstrýktıvti aýrýy, bronh demikpesi, ókpeniń ınterstıtsıaldyq aýrýlary sııaqty tynys alý joldarynyń sozylmaly aýrýlary bar patsıentter birinshi kezekte «táýekel tobynda» bolady, sebebi olardyń tynys alý júıesiniń vırýstyq júktemege qarsylasý qabileti óte tómen», - deıdi kardıologııa jáne ishki aýrýlar ǵylymı-zertteý ınstıtýtynyń joǵary bilim alýdan keıingi jáne qosymsha bilim berý departamentiniń basshysy Sáýle Kasenova.
Pýlmonolog dáriger densaýlyqqa muqııat qaraý kerek ekenin, ol úshin tómendegi keńesterdi nazarda ustaý kerektigin aıtty.
- dúnıe júzinde óziniń tıimdiligin kórsetken karantın sharalaryn oryndaý qajet;
- dúkenge aptasyna 2 ret tek qana qajetti azyq-túlikke shyǵý kerek;
- qoqysty meılinshe basqa adamdarmen qarym-qatynastyń bolý múmkindigi az ýaqytta - tańerteń erte nemese keshki ýaqytta shyǵarǵan durys;
- teledıdardy kúnine tek qana qajetti aqparatty alý úshin 2 saǵat qana kórgen durys;
- tynys alý joldarynyń epıtelıalyq jasýshalaryn qorǵaıtyn A, E jáne S dárýmenderin qabyldaý qajet;
- gıgıena sharalaryn oryndaý kerek.
Onyń aıtýynsha, oqshaýlaný kóp ýaqytty otbasy múshelerimen birge ótkizýge múmkindik beredi.
«Stresti óz betinshe jeńip shyǵa almaıtyn jalǵyzbasty egde adamdardy, balalardy, jasóspirimderdi qoldańyzdar. Negatıvti stress adam ımmýnıtetine keri áser beretindikten úreıli kóńil-kúıden alshaq bolyńyzdar. Zııandy ádetterden, ásirese temeki shegý, jastar ishinde paıda bolǵan elektrondy sıgaretter men kalıan shegýden bas tartýdyń ýaqyty keldi. Qaýipti ýaqyt ta bitedi, ómir de óz qalpyna keledi, ol úshin ózińizdiń jáne sizdi qorshaǵan adamdardyń densaýlyǵyn saqtaý qajet», - deıdi ol.
