Efırde qazaqtyń án men kúıi sańqyldap estilip turýy kerek - Nurtóre Júsip
«Mádenıet – Ulttyq qundylyq qataryna jatady. Bizdiń Ulttyq Táýelsizdigimiz Qazaqstandy mekendep otyrǵan barlyq ult pen ulys ókilderin qazaq mádenı keńistiginde ómir súrýge jeteleıdi. Bul ne degen sóz? Túsinikti bolý úshin myna bir nárseni aıta keteıin. Shekara syzyǵy ne úshin syzylady? Bul – eldiń qorǵanys shekarasy ǵana emes, mádenıet shekarasy degen sóz. Osy syzyqtyń ishinde mádenı keńistik bolady. Mádenı keńistik aıasynda Ulttyq qundylyqtar qalyptasady. Biz Ál-Farabıdiń, Abaıdyń jáne basqa tarıhı tulǵalardyń mereıtoılaryn tek toı toılaý úshin ótkizbeımiz. Bul sharalar Qazaqstan halqyn birtutas – bir mádenıet sheńberinde tárbıeleýge baǵyttalǵan.
Qazaq tarıhyn, ádebıeti men mádenıetin, turmys saltyn, dástúrin bilý, qurmetteý, moıyndaý – mádenı keńistiktiń alǵysharty»,- dedi senator.
Osy turǵydan alǵanda Nurtóre Júsip qaraýǵa usynylǵan «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» QR Zańynyń jobasynda birqatar jańa norma bar ekendigin atap ótti.
«Ónerde tazalyq kerek! Ómirde de solaı. Fonogrammamen án aıtý shekteledi. Bul taza talanttarǵa jol ashady. Zań jobasynda tıisti normalar qarastyrylǵan. Muny qoldaımyn. Qazaqstannyń Tuńǵysh Prezıdenti – Elbasy tapsyrmasymen «Mádenı mura» baǵdarlamasy jasaldy. «Qazaqtyń 1000 áni», «Qazaqtyń 1000 kúıi» jınaqtaldy. Sonymen is bitti me? Qazaqtyń 1000 áni, men 1000 kúıi efırden nege estilmeıdi? Efır – Qazaqstan efıri. Ondaǵy jıilikti memleket beredi. Qazaqstanda jumys isteıtin túrli radıo arnasy efırlik jıilikti konkýrs arqyly alady. Endeshe nege biz Memlekettiń Mádenı murasyn keńinen nasıhattaý máselesin talap ete almaımyz? Radıo taratýshylarǵa nege mindetteı almaımyz? Qazaqstan efırinde qazaqtyń án men kúıi sańqyldap estilip turýy kerek. Sonda ǵana eldegi Rýhanı jańǵyrý erekshe sıpatqa ıe bolady. Aldaǵy ýaqytta osy talap eskerilse deımiz», - dedi ol.
