Efıopııany sońǵy jarty ǵasyrda bolmaǵan qýańshylyq jaılap tur
ASTANA. QazAqparat -. Efıopııadaǵy qýańshylyqpen kúres júrgizip, onyń saldaryn joıý úshin memleketke 1 mlrd 400 mln dollar qarajat kerek eken. Osy rette jergilikti bılik halyqaralyq qaýymdastyqtan kómek surap otyr, dep habarlady www.24.kz.
Óıtkeni eldegi azyq-túlik qory 1 mamyrǵa deıin taýsylýy múmkin. Efıopııa halqy sońǵy jarty ǵasyrda bolmaǵan alapat qýańshylyqtyń azabyn tartyp otyr. Mamandar «bárine «El-Nıno» sebep» deıdi. Tynyq muhıtynyń ekvatorlyq bóliginde temperatýra aýytqyp, sonyń saldarynan 10 mln.-nan astam turǵyn ashtyqtyń qurbanyna aınalǵaly tur. Ótken jyldan beri jarytyp as ishpeı júrgen halyq sany 3 esege artypty.
«Efıopııanyń keıbir aýdandarynda jańbyr jaýmaǵanyna 1 jyl boldy. Bul jaǵdaı aýyl sharýashylyǵy salasyna kesirin tıgizip otyr. Sonymen qatar, aýyzsý máselesi de ótkir tur», - deıdi BUU ókili: Pol Hendlı.
Eldiń shyǵys bóliginde mal jappaı qyrylyp jatyr. Egis alqaptary da qýrap qalǵan. Sonyń saldarynan 7,5 mln fermer shuǵyl kómekke zárý. Búgingi tańda Efıopııada 5 jasqa deıingi 450 myń bala asqa jarymaı júr. Ashtyqpen qatar elde túrli aýrýlar taraı ma degen de qaýip bar. Óıtkeni, shól qysqan halyq tirshilik nárin mal sýarylatyn las sýqoımalarynan alyp ishýge májbúr.
Foto:dymontiger.livejournal.com
