Efıopııaǵa buryn-sońdy bolmaǵan asharshylyq qaýpi tónip tur - BUU

NUR-SULTAN. QazAqparat – Birikken Ulttar Uıymy (BUU) Efıopııa aımaǵynyń turǵyndary sońǵy onjyldyqta buryn-sońdy bolmaǵan ashtyqqa ushyraýy múmkin ekenin eskertti, dep habarlaıdy QazAqparat BUU saıtyna silteme jasap.

Uıymnyń jańa baıandamasynda Efıopııalyq Tygraı aımaǵynyń áskerı qaqtyǵysynan zardap shekken turǵyndarynyń 70 paıyzdan astamy jarytyp tamaq jemeıdi delingen.

BUU-da qabyldanǵan jikteýge sáıkes, óńirdiń 350 myń turǵyny ashtyqqa jaqyn, bul azyq-túlik tapshylyǵynyń sońǵy, besinshi kezeńi.

BUU-nyń habarlaýynsha, sońǵy onjyldyqta birde-bir elde ashtyq aldynda turǵan adamdardyń qarasy mundaı kóp bolmaǵan.

Efıopııanyń soltústiginde 5,5 mıllıon adam tamaqqa jarymaı otyr. Qaqtyǵystan aýyl turǵyndary qatty zardap shekti.