Efıopııadaǵy qarýly qaqtyǵys densaýlyq saqtaý júıesine kedergi keltirip otyr
ASTANA. KAZINFORM — Efıopııanyń soltústiginde jalǵasyp jatqan qarýly qaqtyǵystar aımaqtaǵy densaýlyq saqtaý júıesiniń jumysyna qaýip tóndirip otyr. Bul týraly Dúnıejúzilik densaýlyq saqtaý uıymynyń (DDU) bas dırektory Tedros Adanom Gebreıesýs X áleýmettik jelisindegi paraqshasynda jazdy, dep habarlaıdy Report.
— Efıopııanyń soltústigindegi zorlyq-zombylyq onsyz da álsiz densaýlyq saqtaý júıesin kúıreý shegine jetkizdi. Aýrýhanalarda medıtsına qyzmetkerleri, dári-dármek pen medıtsınalyq jabdyqtar jetispeıdi. Shuǵyl medıtsınalyq kómek kórsetý múmkindigi de aıtarlyqtaı shektelgen. Qaýipsizdik jaǵdaıynyń turaqsyzdyǵynan keıbir aýdandarǵa asa qajetti medıtsınalyq zattardy jetkizý múmkin bolmaı otyr, — dep jazdy ol.
DDU basshysy Amhara jáne Tygraı aımaqtarynda beıbit turǵyndarǵa shabýyl jasalǵany týraly habarlarǵa alańdaýshylyq bildirdi.
Onyń aıtýynsha, Amhara aımaǵyndaǵy ishki qonys aýdarýshylarǵa arnalǵan Djaarı-2 lagerine jasalǵan soqqy saldarynan balalar, sonyń ishinde jańa týǵan náreste qaza tapqan. Al Tygraı aımaǵyndaǵy Rama qalasynda birneshe adam kóz jumǵan bolýy múmkin.
Gebreıesýs Efıopııada ushqyshsyz ushý apparattarynyń soqqysynan beıbit turǵyndardyń qaza tabýy jıilep ketkenin atap ótti.
Onyń málimetinshe, Dúnıejúzilik densaýlyq saqtaý uıymy BUU qurylymdaryndaǵy seriktesterimen birlesip, zardap shekken aýdandarǵa qosymsha medıtsınalyq júk jetkizý jumystaryn júrgizip jatyr.
Sonymen qatar uıym basshysy qarýly qaqtyǵystar jalǵasa berse, medıtsınalyq kómekke muqtaj adamdardyń sany arta túsetinin eskertti. Bul shuǵyl medıtsınalyq qyzmetterge, ana men bala densaýlyǵyn qorǵaýǵa, sondaı-aq túrli aýrýlardy emdeýge qol jetkizýdi qıyndatýy múmkin.
Gebreıesýs beıbit turǵyndardy qorǵaýǵa, medıtsına qyzmetkerleriniń kómekke muqtaj adamdarǵa kedergisiz jetýine jáne gýmanıtarlyq kómektiń jetkizilýine jaǵdaı jasaýǵa shaqyrdy.
— Eń batyl adamdar beıbitshilikti tańdaıdy. Eń jaqsy em — beıbitshilik, — dep túıindedi DDU basshysy.
Aıta keteıik, DDU bıyl medıtsına nysandaryna jasalǵan 900-den astam shabýyldy tirkedi.
