Efıopııada Tuńǵysh Prezıdent kúni atalyp ótti

ADDIS-ABEBA. QazAqparat – Qazaqstannyń Efıopııadaǵy Elshiligi QR Tuńǵysh Prezıdent kúnine arnap semınar ótkizdi, dep habarlaıdy QazAqparat Syrtqy ister mınıstrliginiń saıtyna silteme jasap.

Іs-sharaǵa Syrtqy ister mınıstrliginiń, ǵylymı-zertteý ınstıtýttarynyń, BAQ ókilderi, sondaı-aq Addıs-Abeba ýnıversıtetiniń stýdentteri qatysty.

Qazaqstan Elshisi Barlybaı Sadyqov Elbasy Nursultan Nazarbaevtyń ómiri men shyǵarmashylyǵy týraly prezentatsııa jasady.

N.Nazarbaevtyń basshylyǵymen Qazaqstan tabysty saıası, ekonomıkalyq jáne áleýmettik reformalar júrgizgeni atap ótildi.

Qazaqstan zamanaýı, demokratııalyq, damyǵan memleket, álemdegi básekege qabiletti 50 eldiń qataryna endi.

Elbasynyń halyqaralyq beıbitshilik pen qaýipsizdikti nyǵaıtýdaǵy, ıadrolyq qarýsyzdaný men taratpaý úderisine úles qosýdaǵy, senim sharalaryn qurý jáne janjaldardy boldyrmaıtyn jáne beıbitshilikti saqtaýdaǵy róli erekshe atap ótildi.

Qoǵamdaǵy etnosaralyq jáne dinaralyq qatynastardy, toleranttylyq pen kelisimdi úılestirý saıasatynyń mańyzdylyǵy aıtyldy.

Semınarǵa qatysýshylar úshin fotokórme uıymdastyrylyp, Elbasyǵa arnalǵan fılm kórsetildi.

Sonymen qatar, 25 qarashada Efıopııanyń tanymal «Kapıtal» gazetinde Elbasynyń qyzmeti týraly maqala jarııalandy. Maqalada ıadrolyq qarýsyzdaný, terrorızmge qarsy kúres jáne órkenıetaralyq dıalog salalaryndaǵy Elbasynyń halyqaralyq bastamalary álemniń beıbitshilik pen qaýipsizdik isine qosylǵan úlesi zor ekendigi atalǵan.

N. Nazarbaevtyń basshylyǵymen Qazaqstan Reseı, Qytaı, AQSh, Eýrodaq, óńirlik kórshilerimen strategııalyq jáne keńeıtilgen seriktestik jáne álemniń barlyq elderimen dostyq qarym-qatynas ornatty.