Efıopııada memlekettik emtıhan kezinde áleýmettik jeliler shekteldi
ASTANA. QazAqparat - Efıopııa úkimeti joǵary oqý oryndaryna túsý úshin memlekettik emtıhan tapsyrý kezinde el aýmaǵynda áleýmettik jelilerdiń jumysyn shektedi, dep jazady AFP.
Jergilikti bıliktiń osyǵan qatysty arnaıy qujatynda «áleýmettik jelelderdiń jumysyna tyıym salý emtıhandy jetkilikti deńgeıde ótkizýge múmkindik beredi» dep jazylǵan. Tyıym salynǵan jeliler qatarynda - Facebook, Twitter, Instagram jáne Viber bar. «Bul ýaqytsha shara, sársenbige sheıin ǵana sozylady. Al, áleýmettik jeliler abıtýrentterge kedergi jasaıdy», - dep málimdedi úkimettiń baspasóz hatshysy Getachıý Reda.
BAQ-tardyń habarlaýynsha, saıttardy resmı túrde shekteý Efıopııada birinshi ret bolyp otyr.
Eske sala ketsek, ótken aptada BUU keńesi ınternetke tyıym salý adam quqyǵyn buzatynyn moıyndaǵan bolatyn.
