Efıopııada qulaǵan ushaqtyń ishinde BUU 19 qyzmetkeri bolǵan

ASTANA. QazAqparat - BUU bas hatshysy Antonıý Gýterrısh Efıopııada ushaqtyń apatqa ushyraýynan qaza tapqandardyń otbasylaryna kóńil aıtty. Bul týraly QazAqparat BUU jańalyqtaryna silteme jasap habarlaıdy.

BAQ-tyń aqparatyna sáıkes, jeksenbi tańerteń Addıs-Abebtan Naırobıge bet alǵan «Efıopııa áýe jelileri» áýe kompanııasynyń Boıng 737 ushaǵy Debre-Zeıt qalasyna jaqyn jerde apatqa ushyrady. Áýe laıneriniń bortynda 157 adam bolǵan, sonyń ishinde segizi - ekıpaj múshesi. Aldyn ala aqparat boıynsha, aman qalǵandar joq.

Sondaı-aq, mert bolǵandar arasynda BUU júıesi mekemeleriniń 19 qyzmetkeri, sonyń ishinde Halyqaralyq kóshi-qon uıymdary, Dúnıejúzilik azyq-túlik baǵdarlamasy, BUU bosqyndar isi jónindegi basqarmasy, BUU qorshaǵan orta baǵdarlamasy jáne Dúnıejúzilik Bank qyzmetkeri bolǵan.

Óz kezeginde bas hatshy qaza tapqandardyń týystary men jaqyndaryna, BUU qyzmetkerleri otbasylaryna, Efıopııa úkimeti men halqyna kóńil aıtty.

QR Syrtqy ister mınıstrliginiń baspasóz qyzmeti ushaq bortynda qazaqstandyqtardyń joq ekendigin rastady.

Eske sala keteıik, Efıopııada Ethiopian Airlines áýe kompanııasynyń Naırobıge bara jatqan ushaǵy apatqa ushyraǵandyǵy týraly buǵan deıin habarlaǵan bolatynbyz.