Efıopııada qazaq mádenıetine arnalǵan shyǵarmashylyq kesh ótti

ADDIS-ABEBA. QazAqparat – Qazaqstannyń Efıopııadaǵy Elshiliginde Qazaqstan Táýelsizdiginiń 30 jyldyǵy men Jambyl Jabaev, Muqaǵalı Maqataev, Ybyraı Altynsarın, Dına Nurpeıisovanyń mereıtoıyna oraılastyrylǵan qazaq mádenıeti men shyǵarmashylyq keshi ótti. Bul jaıynda syrtqy ister mınıstrliginiń resmı saıtyna silteme jasap QazAqparat habarlaıdy.

Іs-sharaǵa Addıs-Abebada turatyn qazaq dıasporasynyń ókilderi, sondaı-aq QR Elshiliginiń ujymy qatysty.

Mádenıet keshi óskeleń urpaqtyń qazaq dástúrleri men ádet-ǵuryptary, uly tarıhı tulǵalar jáne olardyń qazaq mádenıetin, atap aıtqanda ádebıet, poezııa jáne halyq mýzykasyn damytýǵa qosqan zor úlesi týraly bilimderin keńeıtý maqsatynda uıymdastyryldy.

Merekelik is-shara barysynda Jambyl Jabaev, Abaı Qunanbaev, Muqaǵalı Maqataevtyń, sondaı-aq qazaq halqynyń tarıhynda óshpes iz qaldyrǵan basqa da kórnekti tulǵalardyń ádebı jáne mýzykalyq shyǵarmalary oryndaldy.

Mádenı kesh qonaqtaryna elshilikte Qazaqstannyń elordasy – Nur-Sultan qalasyna arnalǵan, Táýelsizdik jyldaryndaǵy elimizdiń damý qarqynyn sýretteıtin fotokórme usynyldy.

2020 jyly Qazaqstannyń Efıopııadaǵy Elshiliginde Abaı Qunanbaev atyndaǵy Qazaq mádenı ortalyǵy ashyldy.

Sodan beri Ortalyq birqatar mańyzdy mádenı is-sharalar ótkizdi.

Ótken jyldyń ekinshi jartysynda pandemııaǵa baılanysty mádenı ortalyq óz qyzmetin ýaqytsha toqtatýǵa májbúr boldy.

Búgingi shara barysynda mádenı ortalyq óz qyzmetin qaıta jandandyrdy.